Ultimo dianan di e exhibicion cu ta conecta culturanan Indigena y comunidadnan actual den Caribe

E exposicion internacional temporario di NEXUS 1492, Caribbean Ties (Lasonan Caribeño, hendenan conecta antes y awor) ta den su ultimo siman. Museo Arqueologico Nacional Aruba (MANA) hunto cu Fundacion 1403 y Fundacion Kapel di Bethania, a logra trece e exposicion internacional temporario aki mas cerca di comunidad di Aruba y despues di algun tempo lo ta terminando diaranson awo dia 31 di augustus.

Caribbean Ties (Lasonan Caribeño, hendenan conecta antes y awor) ta un exposicion unico y emocionante cu ta presenta e diversidad y complehidad cu tabata existi den Caribe prome cu e yegada di e Europeonan y cu ta sigui presente den actualidad. Combinando perspectivanan local, regional y global e exhibicion ta conecta culturanan Indigena y e comunidadnan actual den Caribe.

E exposicion ta brinda e oportunidad pa enrikece e interpretacion di e sitionan y legado Indigena den full Caribe pa educa e muchanan cu ta bay scol, comunidadnan local y e bishitantenan. Caribbean Ties a wordo inaugura na mei 2019 na mas di 10 pais simultaneamente.

Fundacion 1403 ta un fundacion non profit cu ta traha pa promove e estudio, documentacion, presentacion y preservacion di e patrimonio Indigena di Caribe. Un vehiculo principal pa logra e obhetivonan aki a wordo identifica como un exposicion na diferente luganan, regional y internacional ariba e patrimonio aki. Fundacion 1403 ta e socio principal pa recaudacion di fondonan necesario di Caribbean Ties.

NEXUS 1492 ta un proyecto di investigacion interdisciplinario cu ta financia pa e Comision Europeo y dirigi pa e Universidad di Leiden cu ta involucra diferente socionan di investigacion internacional y regional, y ta contribui pa skirbi un capitulo crucial den e historia global cu ta central den e transformacionnan di e cultura Indigena.

Na 2019 MANA a ricibi e exposicion Caribbean Ties como regalo for di Universidad di Leiden. E exposicion Caribbean Ties ta resultado di un colaboracion entre e proyecto NEXUS 1492 di Universidad di Leiden, Fundacion 1403, MANA, diferente instancia Caribense y MUSEON na Hulanda.

A conduci un investigacion di e historia indigena di Caribe for di e tempo prome cu Columbus a yega y e resultado ta un historia for di punto di bista di e indigenanan y no for di punto di bista di e Europeonan. E exposicion ta enfatisa e similaridadnan den Caribe, cu ta resultado di e herencia comparti.

E exposicion a ser presenta na Hulanda, Aruba, Statia y otro islanan di Caribe di mesun forma cu varios tema. E temanan ta multiculturalismo, migracion, intercambio economico y social, cambio den comemento y creencia, y futuro di pasado. E caracter educativo di Caribbean Ties aki a ser amplia cu produccion di cuater video cortico y specialmente pa scolnan y otro gruponan e ta un oportunidad unico pa amplia conocemento di historia di Aruba y Caribe.

Museo Arqueologico Nacional Aruba ta extende su invitacion na pueblo di Aruba cu ainda no a haya e oportunidad pa pasa y experiencia e bunita exposicion aki, Caribbean Ties (Lasonan Caribeño, hendenan conecta antes y awor) pa pasa e siman aki, dialuna of diaranson entre 9or di mainta pa 3or di atardi na e kapel intimo di e Convento di Imeldahof cu ta den su estado original. Na mesun momento tur bishitante por cera conoci tambe cu e historia di Parokia di Noord, di e soeurnan di Bethania cu a biba y traha na Imeldahof.