Ultimo dia pa paga number di auto ta bira 15 di februari

E ultimo dia pa paga number di auto ta bira 15 di februari enbes di 31 di januari. Segun Departamento di Impuesto, un di e motibonan tras di e decision aki ta pasobra a bira imposibel pa atende cu e cantidad di hende cu a bin acudi den e ultimo dianan.

Vocero di Departamento di Impuesto, sra. Meverly Romano ta bisa Bon Dia Aruba cu no solamente na e localidad na Camacuri, pero tambe na e otro puntonan di contacto na Noord, Paradera, San Nicolas y St. Cruz a haya un cantidad grandi di cliente. Dado momento a bira dificil pa yuda e clientenan aki pa nan por tin nan number paga y pa cumpli cu e fecha di 31 di januari. “Esey ta un motibo hopi grandi cu a pisa hopi pa por a tog delibera cu Minister di Financia pa cambia e fecha pa 15 di februari.”  E ley no ta duna un particion mas hopi cu dos biaha durante aña, pues: e prome mita di e impuesto por lo menos mester ta paga pa 15 di februari anto e otro mita pa dia 30 di juni. “Cada aña e cantidad di cliente ta crece pues for di december caba nos ta habri e posibilidad di pago. Asina e clientenan cu ta desea di haci pago e temporada ey, pues nan tin e chens eynan pa haci e,” sra. Romano ta splica. Tin un grupo cu berdaderamente ta paga na luna di december, sin embargo e massa di hende tog ta keda bin mas laat den januari cual ta semper e periodo di mas druk. E biaha aki Departamento di Impuesto ta admiti cu esaki a bira un tiki mas pio door di e cambio di ley. E departamento ta enfatisa cu no ta bay saca cobransa adicional si no cumpli cu fecha nobo di 15 di februari . Esaki pues ainda ta un aña transitorio.

Caos
E ultimo dianan aki comunidad di Aruba a experiencia caos total pagando nan number di auto na diferente departamento. Un persona di edad a desmaya despues di para den fila pa tanto ora den solo na Camacuri. Na MFA Noord, Polis a ser yama pa intermedia den un situacion cu por a bay for di man y cantidad di hende a keda keha riba rednan social riba e calidad di servicio. Algun ciudadano a remarca cu e sistema di paga number di auto na Aruba ta uno antiguo cu mester modernisacion. Na Hulanda of Merca  por ehempel,  cu bon planificacion, bo por paga te cu tres luna adelanta online sin necesidad di haci fila.  Esaki ta entre otro algun di e cosnan cu ciudadanonan frustra a trece pa dilanti.

Pago via banco
Departamento di Impuesto mes no tin un sistema pa haci pago online. E pagamento online ta posibel via e banco di e cliente. Sra. Romano ta informa cu: “Ora bo ta haci pago online via banco, bo mester tene cuenta si cu nos mester tin por lo menos cinco dia di trabao pa nos por procesa e pago ey. Despues e cliente por pasa busca su recibo y sticker na e edificio otro banda na Camacuri.”  Bo mester bin cu bo comprobante di pago, comprobante di registro y seguro.  “Na e edificio otro banda nos ta controla tur e documentonan, e ora e cliente ta haya su recibo y sticker. Pues esunnan cu ta paga via banco no tin mester di tuma number paden y bin sinta den e massa pa haya nan sticker y recibo. Nos ta yuda nan separa,” sra. Romano ta splica.

Falta di personal?
Un di e kehonan cu varios ciudadano a trece pa dilanti tambe ta e falta di cahera. Bon Dia Aruba a puntra sra. Romano si nan ta haci falta di personal pa por brinda un miho servicio cual el a contesta cu: “Awor akinan e ta haci falta na momento cu nos tin personal cu pa un of otro motibo nan no t’ey. Por ehempel nan ta malo of no por ta presente e ultimo dianan aki.” Locual nan ta haciendo pa purba remedia esaki ta pa saca personal cu antes tabata funciona como cahera pa yuda ora mester.  Segun sra. Romano: “Nos tin caheronan patras cu ta procesando pagonan cu ta drenta via check. Pagonan di cualkier tipo di impuesto manera Bbo etc.
E caheronan aki nos ta yama ‘binnen kassier’. Nos ta manda nan pa yuda dilanti.”
Tambe, a pone dos cahero na otro banda di sala pa yuda e personanan di edad. A haci esaki pa por yuda e grupo di hende aki bay mas lihe y evita cu nan ta keda mucho largo den e massa di hende.