Departamento di Impuesto (DIMP) mediante su rednan social a informa cu e fecha pa paga e di dos mita di impuesto pa vehiculo di motor ta yegando y si no lo cumpli cu esey despues cu esey, contribuyentenan mester paga un multa di 50% adicional.
Pa e pago por bay mas lihe, contribuyentenan por haciel’e via online via e cuentanan di diferente banco ta recomendabel pa haci pago online via banco uzando e metodo di Bill Payment den cual di un manera facil por yena e informacion rekeri. Via Bill Payment transaccionnan di paynan online via Aruba Bank, Banco di Caribe or Caribbean Mercantile Bank ta pasa den e sistema di Departamento di Impuesto den un dia y si algun contribuyente no lo paga prome cu dia 30 di juni, nan ta bay haya un multa di 50% adicional na e pago corespondiente.
Tambe por bay na nan oficina principal na Camacuri, MFA di Noord, Paradera, Santa Cruz y Savaneta y tambe na oficina di San Nicolas ubica den Post Office San Nicolas.
Nan a informa na comienso di aña cu impuesto di vehiculo di motor pa e aña aki a keda igual cu aña 2022, contribuyentenan cu no ta corda e suma di e impuesto cu e mester a paga, por consulta e comprobante di registracion di e vehiculo di motor, cu el a ricibi di Departamento di Impuesto ora a registra e vehiculo.
