Awe ta ultimo dia pa partidonan cu no tin asiento den parlamento pa yega na e 578 firma di simpatisantenan pa por participa den siguiente eleccion. Partido MAS a cumpli cu su firmanan awe y ainda falta partido ABO cu actualmente tin 298 firma. 

E organisacion Rainbow Warriors international a haci algun observacion y comparti cu Bon Dia Aruba pakico parce partidonan grandi no ta apoyando e chikitonan pa yega na nan firmanan den e eleccion aki, manera segun Milton Ponson ta un tradicion desde 1989.

MAS: ‘Otro partido a paga, nos no’
Lider di partido MAS Holmo Henriquez ta contento con e proceso aki a bay pa nan y ta conta nos cu nan no ta sorprendi cu e cantidad di hende cu a bin firma pa nan, mirando cu nan ta un partido nobo.
“Nos mes no a campaña pa esaki anto door di esey bo ta haya e tardansa e ora pa hendenan yega. Pero el a bay hopi bon. Nos tin suficiente tempo pa caba cu e lista.” Sr. Holmo ta enfatisa cu nan partido no a paga pa hendenan bin firma. “Y esey mi tin bon conocemento cu otro partidonan cu a cera nan lista den e prome y di dos dia caba a haya hende cu a wordo paga pa bin firma. Nos firmanan ta solido.” Cua partido a paga, e no ta indica.

ABO: ‘Esunnan mas critico no por drenta’
Lider di ABO Elton Lioe-A-Tjam ta conta nos cu e unico cos cu nan partido ta bende y ofrece ta solamente conocemento. E ta laga sa cu e prome dos dianan tabata un Carnaval eynan cu ‘rancamento di siboyo’ manera el a describi e, hasta tabata tin intimidacion. “Hopi hende a bisa mi nan no ta bin firma pasobra e cos aki no tin privacidad of nan tin miedo. E lo tabata mas miho si Hulpbestuurskantoor nan tabata habri. Of si hendenan por a drenta sin cu tabata tin ningun sorto di lista riba ken ta sostene ken.” E ta bisa nos cu RAIZ recien a wordo lanta y no tin agenda ainda, pero a logra nan firmanan den dos dia. “POR a manda nan hendenan pa RAIZ. AVP cu POR a manda hende pa CURPA, RED a haya hendenan di POR cu AVP, pero MAS cu ABO no. Saca bo conclusion: esunnan mas critico no por drenta, mientras cu tur esunnan cu recien a lanta si por.”

Observacion di Rainbow Warriors
Fundacion Rainbow Warriors International di Milton Ponson, ta un organisacion di derechonan humano y desaroyo sostenibel na Aruba. E organisacion aki a participa un par di siman pasa como observador den e consulta popular Venezolano, unda tur ciudadano pafo di Venezuela por a yena un formulario riba tres pregunta di haber cu Asamblea Nacional Constituyente. Sr. Ponson incluyendo algun otro hende manera Edwina Henriquez ta haciendo mescos cu e proceso electoral. “Mirando cu desde 2013 no tin un comision di buena conducta mas, pa e eleccion di 2017 nos a tuma riba nos mes, un deber moral como organisacion di derecho humano pa vigila mas tanto kico ta pasando den eleccion.”

E ta conta nos cu e aña aki ta un proceso cu a cuminsa na 1989 unda tabata prome biaha cu eleccion a wordo yama pa di dos biaha, a crea un tradicion desde e tempo ey na unda partidonan grandi – basa riba principionan di democracia – ta sostene partidonan chikito. Pues nan tabata manda nan militancia politica pa e partidonan cu no ta logra yena nan listanan na ultimo ora.

‘Hopi cos por pasa ainda’
Sr. Ponson ta splica cu nan a purba di analisa dicon partidonan grandi pa prome biaha ta parce cu no ta presentando nan mes pa yuda e partidonan chikito tambe yega eleccion.
“Si bo calcula, e ta mustra pa loke ta restzetels (asiento di sobra, red.), cu e scenario ta of tres restzetels, of dos of uno. Pero ta mas probabel cu e aña aki e fiesta di tin dos of tres restzetels pa parti entre e grandinan no ta bay ta aplicabel. Esey por ta un rason pakico ni MEP ni AVP a manda hende pasobra cu siete nan tin un miho margen pa capta cada un of por lo menos un asiento di sobra.”

‘Hopi cos por pasa ainda’ pa influencia resultado di siguiente eleccion specialmente si e dos partidonan cu falta logra haya tur nan firma, segun sr. Ponson. Banda di restzetels mester tene cuenta cu otro asuntonan. Basando su mes riba encuestanan politico recien, e ta bisa cu ta parce tin siete asiento ‘flotante’ cu ta hopi mas cu e cantidad di restzetels cu hopi hende ta calcula no lo surpasa tres. Pa e asientonan aki, cu ta casi 15.000 votado, e ta splica cu hopi votado no ta sigur y por cambia di opinion na ultimo ora.

Critica Green Aruba y Citgo
“Aparentemente e ultimo dos partido cu falta no tin apoyo di militancia di partidonan grandi pasobra nan tur dos lo mester a haci algo cu no ta cumbini ni AVP ni MEP. Si nos bay wak kico nan a trece dilanti den e debatenan y publica den prensa, tin dos cos comun entre MAS y ABO. Tur dos a bati fuertemente riba aspectonan di Green Aruba y con bao e capa aki gobierno a haci destruccion na nos pais, paisahe y nos naturalesa.” E ta sigui bisa cu partido ABO a ‘desenmascara’ den mas cu 30 articulo detaya e proyecto di Citgo Aruba di tal forma cu eynan, segun e ta opina, por tin un otro rason pakico nos no ta wak ningun simpatisado di MEP of AVP bin firma pa ABO y MAS.

“Pasobra nan tin miedo cu si e partidonan aki por saca un asiento, ta bay tin hende den parlamento cu ta bay pidi pa saca tur e documentacion di Citgo riba mesa y cuminsa cuestiona. E mesun preguntanan cu nos sa tur dos partido a bay haci caba na gobierno Hulandes.”

Cultura democratico
Sr. Ponson ta conclui: “Si bo ta kere den e cultura democratico y tradicion cu nos a cultiva e ultimo 30 aña, tuma e tempo y oportunidad pa bay firma pa un di e partidonan aki. Pa tin mas tanto partido pa bay eleccion y pa nos tin un miho opcion. Pasobra cu e dos partidonan aki afo, ta dos menos cu ta dedica na saca algun cos na cla. Den pasado hopi partido a bay eleccion sin cu e hendenan cu a firma pa nan a vota pa nan, pero ta pa nos para pa e principionan di democracia y duna tur hende un chens. Na final di dia, den september ta pueblo ta dicidi si nan merece e sosten pa nan bay parlamento. “