Pa medio di un segundo comunicado, Bureau Rampenbestrijding Aruba ta informa tocante e derame di azeta cu a wordo registra durante e fin di siman pasa na Trinidad & Tobago. Nan ta informa cu esaki no ta un menasa pa Aruba cu no lo sinti su efectonan manera esun cu a sosode algun luna pasa.
Bureau Rampenbestrijding Aruba a ricibi notificacion via e canalnan oficial cu diadomingo 15 di october 2017 tabata tin un derami di azeta den e area di Chaguaramas, cerca di e isla Carrera di Trinidad & Tobago. Mayoria parti di e azeta a spula bini na e costa di Chaguaramas for di Williams Bay te cu Scotland Bay. Un asessment di e costa a wordo haci dialuna 16 di october 2017 cual a mustra cu mayoria di e azeta ta concentra na tres area di e bahia. E azeta ta uno pisa, cual ta considera “Heavy Oil”. A pone boom den e area completo di e bahia. E tipo exacto di e azeta y tambe e origen di unda e azeta a lek no ta conoci ainda.
Resultado di scenario imaginatorio
Bureau Rampenbestrijding Aruba a haci uzo di tecnologia pa asina haci un simulacion di e posibel efectonan den caso cu e azeta lo tuma e direccion pa Aruba. E scenario imaginatorio tabata cu na Trinidad & Tobago tabata tin un derame di 5 ora caminda 500 bari di azeta pisa a bini los den e bahia. A haci uzo di e informacionnan di e biento y e direccion di lama for di e dia di e derame y tambe con e biento y lama lo comporta su mes den transcurso di e proximo dianan. Akinan por a bin conclui cu den caso di cu e derame subi lama grandi, esaki lo no causa daño na Aruba segun Rampenbureau. Pues Aruba lo no sinti su efectonan. E efecto lo a hala mas na e parti noord di Aruba na 180 NM (Nautical Miles).
Rapport di claim pa prome derame
Bureau Rampenbestrijding Aruba ta aprecia con consciente e comunidad di Aruba a bira ya cu ningun persona lo ta desea pa Aruba sufri ningun efectonan di un derame di azeta. Tambe na prensa di Aruba cu tabata busca informacionnan necesario pa asina informa e comunidad di e situacion. Nan ta subraya cu: “No por keda sin gradici tur e instancianan oficial cu a suministra e informacionnan regardando e situacion cu e presenta. Un biaha mas Bureau Rampenbestrijding Aruba kier a pone e comunidad na altura cu den tur caso di derame di azeta cu ta pasa pafo di teritorio di Aruba, nan oficina mester haya informacionnan via e canalnan oficial pa asina por suministra esaki na comunidad.”
Aruba ta traha cu Rac-Rempeitc Caribe cu ta situa na Curaçao. Manera cu a sosode den e derame di april/mei ultimo, Aruba a haya e sosten for di Rac-Rempeitc Caribe. E fecha a bira awor pa final di november di 2017 finalisa e rapport y asina presenta esaki na gobierno pa esaki na su turno sigui cu e claim oficial.
