Cu introduccion di Plan di Impuesto 2023, diferente cambio a drenta na vigor desde 1 di januari 2023, entre otro e aumento di e tarifa di BBO y tambe e salario minimo pa director di compania. Otro cambionan cu tambe ta cay den e Plan di Impuesto 2022 ta e reparticion di e peso di impuesto y tambe cambionan pa aumento di cumplimento.
Directora di Departamento di Impuesto (DIMP), Luenne Gomez-Peiters a splica cu tin cambio den e tasa di toeristenheffing caminda cu ta ahusta e tasa di di 9.5% pa 12.5% entrante 1 di januari. El a aclaria cu na momento cu un hotel ta registra su reservacion como un booking den su aangifte toeristenheffing, ta keda e momento cu lo mester aplica e tarifa necesario di impuesto.
Den esaki ta bay reparti un porcion di e entrada total di toeristenheffing entre ATA (57%), Pais Aruba (40.8%) y TPEF (2.2%) teniendo na cuenta cu e entradanan necesario pa ehecucion di e trabaonan di ATA, TPEF y tambe di gobierno pa cu otro tipo di inversionnan manera infrastructura, educacion, etc.
Gomez-Pieters a sigui splica cu ta introduci tambe un ahuste di inflacion di 10.2% pa e tarifanan di toeristenheffing aplicabel pa “timeshares”. Ta mehora tambe cumplimento di impuesto di acomodacionnan alternativo, por ehempel Airbnb, caminda cu por cobra toeristenheffing y BBV di e companianan aki cu ta ricibi pago directo di e huesped pa nan estadia na Aruba. Si e compania aki no ta estableci na Aruba e lo por asigna un representante permanente na Aruba.
El a agrega cu tin un grupo cu no ta cumpliendo cu esaki, cu e cambio introduci den ley esaki l por yuda e cumplimento y yuda Departamento di Impuesto pa asina atende cu compliance ariba e tereno aki.
Otro cambionan cu el a menciona tambe pa loke ta overdrachtsbelasting, el a indica cu ta bay cobra impuesto riba traspaso economico di propiedad inmobil. No ta cobra overdrachtsbelasting ora di hereda propiedad inmobil, pero si ta cobra overdrachtsbelasting riba traspaso di accionnan di entidadnan cu propiedad inmobil na Aruba.
Ta ahusta e tarifa di overdrachtsbelasting na 3% si tin propiedad di un balor te cu 250 mil florin y tur propiedad cu tin un balor riba 250 mil florin, e prome 250 mil florin ta carga un tasa di 3% y loke ta surpasa 250 mil florin ta carag un tasa di 6%. Ta evita acumulacion di overdrachtsbelasting ora di traspaso di propiedad inmobil durante un periodo di 12 luna.
Otro cambionan tecnico ta inlcui eliminacion di e “bijzondere belasting op verhuurauto’s en verhuurmororfietsen” (BBVAM), ta codifica e Plan di Alivio Fiscal number 1 y number 2 y ta duna e posibilidad pa haci declaracion digital di impuesto, obligatorio.
