Ayera tardi a tuma luga e ultimo ayo na Juan Chabaya Lampe, cariñosamente conoci como Padu, y artisticamente como Padu del Caribe, caminda e ilustre yiu di tera a wordo hiba na su ultimo luga di sosiego.

Durante e ultimo añanan, y despues cu Aruba a logra su Status Aparte, Padu a bira un icono artistico di nos identidad cultural, y asina el a yega conkista e titulo bon mereci di nos Tata di Cultura.

Cantidad di hende di tur sector di nos comunidad a presenta na kerki protestant den Wilhelminastraat pa expresa nan palabra di condolencia y solidaridad na Padu su famia, entre nan su yiu muhe Vivian y manera un yiu, Victor Samuel. Tambe Padu su nietonan Ervin y Sonia Anaya, demas famia, amigonan y conocirnan.

Gradicimento di famia.
Padu su nieto Ervin a dirigi algun palabra conmovedor, unda el a bay den recuerdo, tempo cu e tabata un mucha, recordando algun faceta di Padu su bida, entre nan e perdida duro di su casa Daisy. Un etapa cu a costa duro pa e musico por a recupera di dje, y finalmente el a logr’e. “Den e segunda parti di bo bida, despues cu nos wela stima no tabata t’ey mas, bo a mustra nos cu un curason si por cura. Cu un bashi por yena bek y cu un alma por sana,” Ervin a expresa.

El a gradici fundacion Padu cu ta trahando pa preserva e herencia cultural di su welo. Tambe el a extende su palabra di gradicimento na gobierno pa e bunita plasa cu a wordo construi na nomber di Padu. Pero tambe pa e tributo cultural postumo di diahuebs anochi riba dicho plasa. Igualmente tur e artistanan, musiconan, conhuntonan di baile, canto, poesia y teatro pa e bunita homenahe aki. “Nos no por a pidi un despedida mas grandioso cu esey pa nos Padu,” el a bisa.

Un despedida sin ayo.
Padu Lampe tabata un musico virtuoso y un persona multifacetico den diferente tereno cultural. No solamente e tabata un habil pianista, sino cu e tabata compositor y co autor. Igualmente el a explora mundo di literatura cu tema metafisico y arte plastico. E tempo aya, Padu del Caribe a bira un di e poco artista naci na Aruba cu a bira asina popular den nos region, y den otro paisnan manera Merca y Hulanda. Cu su creatividad, el a stempel un seyo unico dunando un identidad musical nacional. Ora cu Padu tabata toca ya sea na Venezuela, Merca, Cuba, Republica Dominicana, Hulanda, Colombia, Puerto Rico, etc… tabata manera Aruba tabata toca.

Padu su vocacion pa musica tabata un don cu a wordo descubri durante su epoca di mucha. For di casi 9 aña e mucha Padu su interes pa musica a expresa su mes espontaneamente. Un anecdota cu Padu mes a yega di conta y cu ta forma parti di su biografia tabata cu un dia ora cu e tabata un mucha di 8 aña, a scucha un bunita melodia cu a bin for di un piano ehecuta pa Rufo Wever, kende tabata 3 aña mas grandi cu Padu. Destino a encarga su mes pa uni e dos talento Arubiano pa produci obranan inmortal, entre nan nos Himno Nacional Aruba Dushi Tera.

Padu su mes a crea un metodo pa crea y produci su obranan musical. E no solamente tabata toca piano, sino cu su don a permiti pa e cuminsa practica entre otro cu cuarta, cu a bira un instrumento clave y esencial p’e. Ta asina cu na su inicio, Padu tabata compone musica riba cuarta y despues, e tabata bin riba piano cune. El a yega di produci mas cu 500 piesa musical. Un parti di nan, ainda ta den mas cu 250 cassette cu danki na Fundacion Padu, y un grupo di musico profesional, nan ta trahando pa transcribi nan riba notula. Nan ta spera cu den cuadro di Padu su 100 aña di natalicio, dia 26 di april 2020, parti di e proyecto aki lo bira un realidad.

Padu a bay laga nos dia 28 di november ultimo. El a keda den un soño profundo pa eternidad. Despues cu Padu no por a toca mas, el a percura hunto cu e cariño di su inseparabel yiunan Vivian y Victor pa laga recuerdo bunita atras. Ta asina cu hopi hende den cualkier evento cu Padu tabata t’ey a percura pa saca un potret hunto cune. Di biaha un sonrisa spontaneo tabata brota di Padu su cara. Un sonrisa cu tabata expresion di su alegria natural cu lo permanece bibo pa semper cerca nos. Un sonrisa compaña cu un palabra cu semper lo sigui resona den nos curason: “Dios bendiciona bo ricamente!”