Ultimo añanan pedofielnan a ricibi castigo di 3 aña y mey, mientras maximo ta 12 aña

Diabierna gobierno a tene un reunion, unda cu a trata e tema di abuso sexual contra menor aki na Aruba. Parlamentarionan y ministernan presente a puntra minister encarga cu Husticia Arthur Dowers, tocante desaroyonan di e proceso di keho, trabou di departamentonan concerni, castigo pa pedofiel y cifra entre otro. 

Dowers a inicia bisando cu hopi esfuerso ta wordo haci door di hopi persona y mi por bisa cu no tur ora e esfuersonan aki ta bin pafo. Y e ta kere cu no tur ora e hopi hendenan cu ta critica gobierno y tur e ambtenaarnan cu ta traha den e casonan aki, ta compronde e complicacion di e circunstancianan cu e hendenan tin cu traha cun’e. ‘Sinembargo, mi ta kere cu ta importante pa realisa cu e materia di abuso specialmente di mucha ta uno compleho.”

Cantidad di casonan registra
E cantidad di casonan cu tin registra na 2013, 2014, 2015 ta indica cu tin un aumento grandi den e casonan aki, segun Sr. Dowes. Ora un aumento asina aki tuma luga, ta haci analisis di kico por ta e causa pasobra e por tin di haber un parti cu cierto cambio den ley. Na 2013 tabatin 39 caso registra, 2014 tabatin 45 y 2015, 80 caso. Den e casonan aki por tin registra abuso contra un mucha y hende grandi, y tambe un cantidad porta di acusacion falso como cu ta mira un aumento den esaki tambe. Pues hendenan ta haci keho contra di hende y despues ta resulta cu esey no ta e caso. Banda di esey ta mira cu antes pa loke ta delito contra di mucha e componente di keho a cay afo y bin na su luga e “hoor procedure”, pues cu hues ta scucha e mucha, cual por haci cu e caso ta bay diferente, Sr. Dowers a splica. 

Castigo
Pa loke ta trata e diferente delitonan, nos ta mira cu abuso sexual, tin 12 aña maximo y si e consecuencia di e violacion ta cu e persona a fayece e maximo ta bira 30 aña, Sr. Dowers a indica cu esaki ta un castigo basta halto. Den caso cu tene relacion cu un mucha menor di edad bou di 12 aña, e maximo castigo cu e persona por haya ta 12 aña, cu un mucha di 12 y 13 aña e maximo di castigo ta  8 aña y cu un mucha bou di 16 aña, ta 6 aña entre otro Tin castigo te cu 25 aña tambe den caso cu un persona comete e acto pa di dos biaha. “E maximo di e castigonan ta hopi pisa.” Ultimo añanan aki na Aruba personanan a yega te na 3 aña y mey di castigo pa e delitonan aki, cual e minister a indica di ta haya considerabel. “E punto di salida cu ta haya for di ministerio publico ta, ora cu tin di haber cu un crimen asesinato, ta cuminsa rond di 10 aña, y ora ta papia di asesinato ta cuminsa banda di 15 aña, siendo cu tin prizon di por bida, el a splica. 

“Nos tabatin combersacion di e manifiesto contra abuso sexual di mucha unda cu a sinta cu e organisacion y contesta tur e preguntanan cu nan a stipula den e manifiesto. Pa loke ta e pregunta di straf minimo, Sr. Dowers a bisa cu nos sistema ta di straf maximo actualmente y e comision cu a bin un tempo a laga e parti di straf minimo bay. Un di e motibonan cu nan a bisa ta cu esaki ta peligroso, pasobra ora cu algo ta net riba e rand, por pasa cu mester dicidi di laga un persona bay completamente liber. Pero e introduccion di straf minimo no ta algo complica, e ta djis cuestion di pasa un articulo unda cu ta bisa cu tur delito cu nos tin cu un straf maximo, ta pone un minimo na dje, el a bisa. Pues esey no ta e problema sino mester evalua e consecuencia cu esaki por tin. 

“Ta mirando aumento di kehonan entrega como mas hende ta papia di dje entre otro, pues mi ta contento cu e desaroyonan cu tin. Ta mira sinembargo hendenan grandi cu ta tene relacion cu muchanan bou 16 aña, pues hende no ta consciente, y ta kere cu kisas mester mas investigacion riba esaki. Ora haci esaki ta tende cu el a pasa mas biaha. Tin ora no ta cu a viola e mucha, pero ta ley ta bisa cu no por haci esaki y por wordo persigui. Sigur tin aumento di consciencia y aumento di diligencia di e departamentonan di husticia pa atende cu e dilemanan aki.” 

Cooperacion departamentonan di gobierno
Cooperacion Voogdijraad y Bureau Sostenemi y JZP ta bayendo hopi bon y door di esey ta mira cu tin mas caso ta wordo trata y ta bin dilanti segun e mandatario. Tin e cooperacion aki, pero tambe e plataforma profesional di gobierno t’ey caminda cu tur e gremionan ta bin hunto, segun Sr.Dowers.

Pa loke ta un instancia separa pa atende cu keho, Sr. Dowers a bisa cu keho mester tuma luga na e aparatonan hudicial cu ta existi. “Mi ta kere no tin duda cu e ta importante pa ora haci un keho e ta wordo bon haci, pa por logra den corte yega na un sentencia. Ta kere cu por reenforsa esaki nan si. Pa loke ta fondo pa Voogdijraad, e mandatario a bisa cu nan mester mas fondo cual ta trahando riba dje y tin personal na caminda.

Registro pedofiel
Si mester registro di tur persona cu comete abuso sexual, el a bisa cu tin un registro di tur persona condena aki na Aruba, kisas mester haci adaptacion den ley caminda cu na momento cu un hende solicita pa cierto trabounan e por haya prueba di cu e no por traha na e cierto trabou pero na otro si. Por ehempel e no por traha na un caminda cu mucha, pero e por bay traha otro caminda cu mata por ehempel. Esaki ta mescos cu un hende cu comete fraude cu no por bay traha cu placa. “Mi ta kere ta algo cu lo por entama un cambio di ley riba dje unda ta haya un tiki proteccion extra, esey lo yuda preveni cu hende ta haci actonan aki, pero tambe pa duna hende cu a haci e acto un di dos chens.

Finalisando el a bisa: “Aworaki ta hopi hende hoben ta comete delito, ora cu nan sali nan no por haya un comprobante di bon conducta pa haci niun trabou, y nan ta keda e ora pa 4 aña of 5 sin por haya trabou cual por pone cu nan ta bay bek den comete crimen.”