Gobernador Refunjol awe ta haci inauguracion di aña parlamentario nobo. Esaki no ta segun plan pasobra normalmente lo tabatin caba den e puesto mas halto un otro persona. E deliberacionnan tocante e posibel candidato o candidatonan no a termina y lo por bay tuma basta tempo ainda. Mester bisa cu, aparte di su mes deseo pa baha, cu nos no conoce, mayoria di pueblo lo no tin un problema cu permanencia di e Gobernador aki den e puesto.
En todo caso nos Gobernador awe lo duna e discurso custumbra, den cual gobierno di Aruba ta trece dilanti kico lo por spera den e aña venidero. No ta spera tanto cos nobo, ya cu presupuesto 2017 a keda cla, te cu tin un prome conseho di banda di CAFT y di Conseho Consultativo. Den ambos caso ta conoci cu nan ta negativo encuanto e plannan di gobierno, den e sentido cu nan ta haya esaki irealistico. Gabinete naturalmente tin otro opinion y loke nos lo tende Gobernador bisa den parlamento no ta su opinion, sino di gobierno mes.
Ta den bes en cuando sa sucede cu Gobernador ta desvia di e texto cu gobierno ta pone su dilanti. Esaki tabata e caso na 2014 ora cu henter e fraccion di AVP a bin bisti na preto, color di luto, como protesta contra e ‘asalto’ aparentemente di gobierno di Reino, cu via e discurso di Gobernador a duna un imagen mas negativo di e situacion y a anuncia varios medida cu despues gobierno no a ehecuta. Entre nan, anuncio di cortamento drastico den gasto di personal, loke nunca a tuma luga. Por cierto cu awor atrobe e tema ey ta bin dilanti, pasobra keto bay ta e peso di e gastonan aki ta haci cu no tin placa pa varios otro cos. Gobierno sin embargo ta prefera di sigui ‘micro-manage’ e gastonan aki en bes di tuma paso mas fuerte, algo cu e instancianan consehero menciona ta keda enfatisa.
Banda di e asunto estrictamente financiero lo ta interesante pa haya sa kico ta e plannan riba algun area importante. Mirando e desaroyo di siguridad publico hopi hende lo tin gana di tende kico ta bay haci pa frena criminalidad en general y specificamente delito cu uzo di arma di candela, manera asalto arma, pero tambe violencia den luganan publico. Ta obvio cu importacion di arma no ta contra cu suficiente accion preventivo, y uzo di arma di candela ta aumentando gradualmente. No ta un cuestion di pone mas placa disponibel pa husticia por traha, pero ta bira tempo pa tende un storia coherente di banda di e ministro kico e ta pensa di haci. Tambe por menciona otro tereno di atencion, manera di abuso di mucha y kico tin programa pa den e aña di eleccion tuma luga na medida concreto pa cuminsa atende e problema aki na un manera mas efectivo. Palabra nos a tende basta caba.
Riba diferente tereno por nota cu por fin nos politiconan a cuminsa move, ta bay tin eleccion, y un di e criticanan mas grandi ta cu den shete aña di gobernacion berde nos no a mira ningun atencion pa creacion di vivienda popular. Tur cos cu a keda ehecuta ta plannan cu tabata sali di gobierno anterior. Es mas, no mucho tempo pasa lider di fraccion berde a laga sa cu e ta haya cu tur hende mester gana suficiente placa pa traha nan mes cas… Mas ridiculo y ignorante ta dificil pa bo ta, si ni un pais relativamente rico manera Hulanda no tin un mayoria di habitante cu tin nan mes cas. Aya mayoria di vivienda ta origina for di iniciativa gubernamental. Aki al contrario gobierno ta presenta tur sorto di show pero riba e puntonan esencial ta faya completamente y no ta mustra nada di e asina yama ‘vision’ di cual e lider supuestamente ta sufri.
Riba tur esaki a bin e ‘confesion’ reciente di Prome Ministro cu en realidad no tin tereno pa duna mas… Segun ministro encarga cu infrastructura por ta cu ‘raspando bom’ por tin talbes mil tereno ainda. Por ta cu ta p’esey e ta corda riba ‘su hendenan’ cu prioridad, pasobra nan no por keda sin haya… Ta inimaginabel e grado di inferioridad di e gobernacion aki, unda awor diripiente a descubri cu tereno na Aruba ta cabando. Ta un proceso di añanan. Y awor ta uza e argumento ey pa kibra e ley di ordenamento teritorial, e unico instrumento di proteccion ambiental crea den tanto aña, pa hustifica e asalto riba loke a keda di nos naturalesa. Loke nan ta bisando nos ta:” Si, nos ta bay destrui loke a keda di naturalesa, pero corda bon cu ta pa boso nos ta haci’e. Ta pa abo y bo yiunan haya tereno pa traha cas.”
Ta bira tempo pa nos enfoca riba e asuntonan esencial na luga di presencia show. Un ehemplo: banda di e ‘Green Corridor’, ki dia ta drecha e desastre di e demas camindanan na Aruba. Di baina a resta un tiki asfalt pa yena algun buraco. Vision, ki dia?
