ORANJESTAD – P3A Conference (Public Private Partnership Aruba) ta tras di lomba. Temanan cu a wordo trata ainda ta den discusion. Durante tres dia a discuti varios topico interesante, di cual un di esnan mas discuti tabata Agricultura. A papia riba desaroyonan den Agricultura y con nan ta liga na sostenibilidad, principalmente pa economianan chikito manera di nacionnan isleño y e rol di partnership entre sector publico y priva.
4 puntonan importante
Den e sesion aki a bin 4 punto importante dilanti di cual e prome ta cu e nacionnan isleñonan tin un economia habri, cu ta importa mayoria di producto y ta depende hopi di prijs di cuminda di exterior. “Bo economia ta depende di otro economianan pa importa cuminda, loke ta pone cu e siguridad di bo comunidad por ta na ‘peligro’ door di dependencia y gastonan asocia na esaki. E ta haci cu prijsnan di cuminda ta volatil, subi y baha. Esaki ta trece e pregunta: con por baha e gastonan,” e moderador di e sesion aki dr. Ryan Peterson a puntra, papiando di loke a bini dilanti den e sesion.
Na di dos luga, segun diferente experto a trece dilanti, mas o menos 50 aña pasa, hopi pais isleño tabata depende di Agricultura. Pero esey a bin ta cambiando y e sector di agricultura a bira hopi chikito den Caribe, causa door di retonan grandi. “E retonan cu casi tur e expertonan a indica, ta relaciona cu gastonan ya cu hopi di e agricultornan tin companianan chikito, falta di financiamento, principalmente den Caribe, pa yuda nan desaroyo nan empresa. Alabes e acceso na tereno tambe ta un problema,” dr. Peterson a bisa. Na Aruba e situacion tambe ta igual, ya cu e acceso na tereno pa agricultura no ta creciendo. E puntonan aki ta haci cu pa mantene y sostene e sector di agricultura ta rekeri un framework mas amplio, crea oportunidadnan nobo pa zonificacion, pa labor, incentivonan pa renoba e sector, expertonan a splica.
Un di tres aspecto cu a resalta, ta e conexion cu a wordo discuti entre Agricultura y Turismo. No solamente Aruba, pero representante di diferente isla den Caribe a trece dilanti, cu pa algun aña caba turistanan ta buscando un ‘cuisine’ mas autentico di e islanan cu na ta bishita. Esaki sigur ta beneficia e desaroyo di un sector local, Agricultura, produciendo mas cuminda y ingredientenan localmente. Peterson a comenta tambe cu na Aruba varios restaurant den ultimo añanan a cuminsa experimenta platonan nobo, cu ingredientenan crioyo. Di e forma aki, ta bezig ta enrikese e experiencia di e turista na Aruba.
E di cuatro tendencia cu a discuti ta cu apesar cu Agricultura ta un sector cu e ultimo 50 añanan a bira menos, por constata cu e ultimo tres añanan tin un generacion nobo di entrepreneur, agri-entrepreneur cu ta combina Agricultura cu entrepreneurship, uzando tecnologianan nobo manera tecnologia solar, hydroponic, pero tambe social media, creando apps pa rejuvenece e sector di Agricultura y bini cu productonan nobo. Di e forma aki, e hobennan ta biniendo cu un innovacion cu ta importante pa economia, creando oportunidadnan nobo y futuro mas sostenibel pa Agricultura.
Fuente: Relato di gobierno
