Segun director AZV:
E pregunta cu ta keda bin dilanti y a wordo haci atrobe na director di AZV ayera ta, si no tin un manera pa cambia e ley si ta mira cu e tipo di casonan manera Kyrenne Croes ta keda bini dilanti. Cuanto caso mas mester pasa pa gobierno y parlamento bini hunto y haci un cambio den ley y algo specifico pa alivia e tipo di casonan aki?
“Esunnan cu mester tuma e decisionnan ey tin cu hacie. Nos no por haci esey pasobra nos tin cu atende ley”, e director di AZV, Anko Ringeling a comenta. Tin algun discusionnan andando caba cu si servicionan cu SABA ta dunando y servicionan di reactiva/revalida un persona cay bao AZV, esey por bira un solucion pa e problemanan aki. AZV ta pro pa esaki y ta kere cu den e ley di AZV ta wordo bisa tambe cu e wetgever ta premira dentro di tanto tempo e tipo di cuido asina por cay bao AZV. Pues e no ta un idea nobo y awor despues di 17 aña tin discusion constantemente cu gobierno y ministernan pa wak si esaki por bira posibel. E ta bay pa e tipo di cuido cual den e caso aki ta verpleegszorg, pa si un pashent mester di e cuido ey e por wordo cubri pa ley.
SABA bao AZV por ta un solucion
Pa pashentnan manera Kyrenne Croes, e tratamento necesario por wordo distingui den dos tipo segun AZV. Uno ta tratamento di specialista medico, cual ta wordo cubri y por wordo haci na Aruba. E otro parti pa pashentnan manera Kyrenne ta e reactivacion y revalidacion no ta wordo haci pa specialista medico y tampoco den un setting cu ta un hospital. E ta wordo haci por medio di fisioterapista y tipo di profesionnan asina den un setting di un verpleeghuis/sala di operacion.
Esaki no ta algo cu AZV ta cubri den ley, SABA ta wordo subsidia directamente pa gobierno. Segun sr. Ringeling, tabata tin discusion caba pa laga SABA cay bao AZV tambe pero esaki no a wordo concretisa ainda. “Unabes esey sosode, e lo cay bao AZV y nos lo percura tambe dentro di SABA pa atende cu pashentnan asina. Y te ainda SABA ta mas dirigi pa hendenan grandi haya un cama eynan. SABA tambe ta dispuesto pa desaroya su mes toch den e direccion ey unda nan por tin un rol pa pashentnan cu mester wordo reactiva of revalida.
Minister no ta dicidi
E director di AZV ta bisa cu pa motibo cu nos ta un pais relativamente chikito, esey ta pone cu un politico of minister ta wordo directamente confronta cu cualkier tipo di casonan manera esun di Kyrenne Croes. Ora cu ley di AZV a wordo traha tempo cu sr. Ringeling tabata director di departamento di Asuntonan Social, tur dia un stapel grandi di documentonan tabata wordo hiba bestuurskantoor pa e minister concerni firma riba ken ta bay haya un carchi di dokter. E tempo ey Staten y gobierno tabata tin un discusion pa no laga e tipo di decisionnan aki den nan man y lanta un organisacion independiente cu ta tuma e tipo di decisionnan ey. Den otro palabra, pa casonan individual manera esun di Kyrenne of baby Lunah y otronan, e minister no ta dicidi. Esunnan cu a traha e ley a traha cierto garantianan tambe den e sistema, cu si un persona no ta di acuerdo cu e decision tuma, e por bay hues y apela su caso, manera e mayornan di Lunah a haci.
“Directamente no ta e minister ta tuma e decision, ta e uitvoeringsorgaan ta tuma e decision. Den e caso di Kyrenne mi sa cu minister ta hopi envolvi pa wak ki posibilidad tin toch pa yuda. Durante temponan cu a pasa mi a experiencia cu hopi politico y minister ta sinti cu mester haci algo te asina leu cu por, pero segun e ley e no ta bay asina”, sr. Ringeling ta splica.
