E siman aki, Minister di Salubridad Publico y Turismo, Dangui Oduber a anuncia cu entrante 1 di januari 2024 lo aumenta e uitkering di pensioen di biehes un biaha mas cu minimo 3%.
Como e Minister encarga cu SVb, naturalmente tin cu pensa riba nos grandinan y con pa yuda nan den e presion cu inflacion ta trece pa nan, segun un comunicado di gobierno. Tin 2 guera actualmente cu ta pone hopi presion riba mundo henter y Aruba tambe ta wordo afecta pa esaki. E factornan externo aki ta pone hopi presion ariba nos pensionadonan. Tarea di gobierno ta pa haci loke ta den su alcance pa yuda e pensionado tur caminda cu por, segun e comunicado.
Aruba tin un recuperacion rapido di turismo cu ta resulta pa un crecemento economico di double digits y asina percura cu e fondonan di seguridad social ta uno stabiel. Pa aña aki, esta 2023, Aruba lo surpasa e nivelnan di aña 2019 cual tabata e miho aña pa pais Aruba.
Danki na e crecemento di turismo tin espacio un biaha mas pa ahusta e uitkering di pensioen di biehes.
Minister Dangui Oduber desde 2017 a aumenta e pensioen di biehes na 4 ocasion. A aumenta na aña 2019, 2020, 2023 y awo na januari 2024. Un otro aumento di 3% lo yuda e pensionado den su poder di compra cual sigur ta necesario, segun e comunicado ta finalisa.
