(AP) – Union Europeo y China ayera a move mas cerca di un conflicto politico pa motibo di e crisis di Covid-19, unda Beijing vehementemente a rechasa restriccionnan di biahe cu algun nacion di UE a cuminsa impone y cu por expande den proximo dianan.
Un oferta di UE pa yuda, incluyendo donacion di vacuna, tambe a keda rechasa cu Beijing insistiendo cu e situacion ta “bao control” y provisionnan medico “den suministro adecua”, segun vocero di gobierno Mao Ning.
Mientras e bloc di 27 nacion a move mas cerca di impone algun forma di restriccion riba biaheronan for di China, Beijing a menasa cu contra-medida. “Nos ta firmemente opuesto na intentonan pa manipula e medidanan di Covid pa propositonan politico y ta bay tuma contra-medida basa riba principio di reciprocidad,” Mao a bisa.
Asina mes, UE a parce determina pa tuma algun sorto di accion conhunto pa sigura cu pasaheronan yegando for di China no ta bay transmiti variantenan potencialmente nobo den e continente.
Un comite special di seguridad di salud di UE hunto cu representantenan di nacionnan miembro di UE a discuti potencial medidanan ayera, y vocero di UE, Tim McPhie a bisa cu “e gran mayoria di pais ta na fabor di test prome cu salida” na China.
Suecia, cual tin presidencia di UE, tambe a bisa den un declaracion cu “biaheronan for di China mester ta prepara pa decisionnan tuma sin previo aviso.”
Cu miedo di wordo gara di sorpresa manera na comienso di e pandemia global na comienso di 2020, e grupo di Respuesta Integra na Crisis Politico di UE awo ta programa pa dicidi awe si ta bay impone rekisitonan di entrada na nivel di UE pa China.
Varios nacion miembro a anuncia esfuersonan individual den ultimo siman. Na mes momento, Centro Europeo pa Prevencion y Control di Malesa a insisti cu e situacion na China no ta representa un riesgo inmediato y general pa salud.
“E variantenan circulando na China ya ta circulando den UE, y pues no ta un reto pa e respuesta immuun” di ciudadanonan Europeo, a bisa den su impact study mas recien publica ayera. Otro cientificonan tambe a bisa cu limite riba biahe por tin tiki impacto riba contencion di e malesa, pero tambe a insisti riba e valor di busca pa varientanan potencial cu no ta na Europa na e momento.
Den ultimo siman, nacionnan di UE a reacciona den un cascada caotico di medidanan nacional pa cu e crisis na China, sin tene cuenta cu un compromiso anterior pa actua den union prome cu cualkier cos.
Italia tabata e prome miembro di UE pa rekeri test di coronavirus pa pashentnan di avion yegando for di China, pero varios otro a bisa cu medidanan asina por no ta e miho opcion pa protege poblacionnan local, ya cu variantenan cu awo ta bin di China ya a keda detecta na Europa, hopi biaha pa varios luna caba.
Francia, Spaña y Italia ya a anuncia medidanan independiente pa implementa reglanan mas fuerte di Covid-19 pa pasaheronan yegando di China. Gobierno Frances ta rekeri test negativo y ta urgi ciudadanonan Frances pa evita biahe no-esencial na China. Francia tambe ta reintroduciendo rekisito di tapaboca riba vuelonan for di China na Francia.
Gobierno Spaño a bisa cu ta bay rekeri tur pasahero di avion yegando di China pa tin test negativo of prueba di vacunacion.
Merca a anuncia rekisitonan di test nobo pa tur biahero for di China, uniendo algun nacion Asiatico cu ya a impone restriccion pa motibo di un aumento den cantidad di infeccion.
Secretario di prensa di Cas Blanco, Karine Jean-Pierre a bisa ayera cu “no tin motibo pa represalia” di Beijing pa paisnan “tumando medidanan prudente di salud pa protege nan ciudadanonan” cu restriccionnan di biahe relaciona cu Covid pa biaheronan biniendo di China. El a bisa cu restriccionnan ta
“basa riba salubridad publico y ciencia.”
