(AP) — Gobierno- y legisladornan di Union Europeo a yega na un acuerdo diadomingo riba elementonan clave di e “acuerdo berde” di e bloc di 27 nacion, reformando e sistema di intercambio di emisionnan di gas di invernadero y pa crea un fondo nobo pa dificultad, pa e paisnan mas afecta pa e medidanan pa combati cambio climatico.
Ambos banda a bay di acuerdo pa pusha industria y companianan di energia Europeo pa reduci nan emision door di agilisa e eliminacion gradual di voucher di contaminacion gratis. Esaki ta haci cu cada ton di CO2 cu ta lansa den atmosfera ta bira mas caro pa contaminadornan.
Comision ehecutivo di UE a bisa cu e medida lo rekeri pa industrianan Europeo reduci nan emisionnan cu 62% pa 2030 riba nivelnan di 2005, compara cu un obhetivo di 43% bao e reglanan anterior.
Pa sigura igualdad, UE tambe ta bay introduci un impuesto riba companianan stranhero cu kier importa productonan cu no ta cumpli cu standardnan di proteccion di clima cu cual companianan Europeo mester cumpli. E asina-yama Carbon Border Adjustment Mechanism a keda acorda siman pasa.
Gobiernonan y Parlamento Europeo tambe a bay di acuerdo pa extende e sistema di intercambio di emision di e bloc pa cubri transport riba tera y e kentamento di edificionan for di 2027. Esaki probablemente ta bay aumenta e prijs di gasolin, gas natural y otro combustiblenan fossiel pa consumidor, dunando un incentivo pa cambia pa alternativanan mas barata.
E acuerdo ta inclui un clausula di emergencia cu ta permiti pospone e introduccion cu un aña si e costonan di energia ta particularmente halto.
Den marco di e crisis energetico actual cu a impulsa inflacion na Europa y na mundo, negociadornan a bay di acuerdo pa tambe crea un fondo di clima social, cu ta bay yuda hogarnan vulnerable y negoshinan chikito pa por carga e costonan mas halto pa combustible resultando di e medidanan nobo. E fondo ta consisti di decenas di biyones di euro y ta bay keda elimina gradualmente for di 2026, y yena cu e placa ricibi di e subasta di voucher di emision.
E acuerdo provisional mester keda adopta formalmente pa parlamento y gobiernonan di UE. E ta parti di e pakete ‘Fit for 55’ di e bloc cu tin meta pa yuda UE reduci su emisionnan cu 55% pa 2030 for di nivelnan di 1990 y alcansa ‘net zero’ pa mita di siglo.
