(AP) – E Union Europeo a keda di acuerdo cu un extencion di 6 luna riba sancionnan contra Rusia dialuna cu e meta di causa disminucion den fondo cu ta drenta Rusia pa financia su guera contra Ucrania despues cu Hungria a kita obhecion contra e decision aki.
E sancion ta contra mercado, finanzas, energia, tecnologia, industria, transport y cosnan di luho. Nan ta inclui un prohibicion riba e importacion of transferencia di petroleo crudo y cierto producto di petroleo for di Rusia na Union Europeo. Awo nan lo keda na luga te cu por lo menos dia 31 di juli.
Algun medida a keda introduci den 2014 despues cu Rusia a anexa Ucrania su Crimean Peninsula, sinembargo e lista a crece significantemente despues di Moscu su invasion di escala completo di su bisiña casi 3 aña atras.
Riba diabierna, e Prome Minister di Hungria Viktor Orban a haci yamado na Union Europeo pa interveni den un disputa di gas cu su pais tin cu Ucrania, El a bisa cu Kyiv su decision di para e transito di gas Ruso dentro di Europa Central a obliga Hungria busca rutanan alternativo, cual a subi e prijsnan di enegia.
Pa satisface Orban su exigencia, e Comision Europeo a manda adhunto un declaracion pa extende e sancionnan dialuna, bisando cu e ta “anticipa cu tur tercer pais lo respetA” Union Europeo su seguridad di energia, y a adverti cu e por tuma accion pa proteha infrastructura critico manera tubonan di gas y petroleo
“Hungria a ricibi e garantianan cu el a pidi tocante e seguridad di energia di nos pais,” Minister di Exterior Peter Szijjarto a bisa den su declaracion. Tur 27 pais di Union Europeo mester acepta pa e sancionnan por keda prolonga.
