Union Europeo a duna boet na un plataforma di videogame Mericano y cinco fabricante di wega, despues cu nan a blokea hungadonan di cumpra copianan mas barata di e weganan na otro pais den e bloc.
Comision ehecutivo di UE a bisa ayera cu a multa Valve Corp., cu ta doño di e plataforma di distribucion di wega di computer Steam, y e fabricantenan di wega un total di 7.8 miyon euro pasobra nan a restringi bentanan a traves di fronteranan violando e reglanan anti-competencia di e bloc.
E companianan a usa asina-yama practicanan di geo-blokeo pa preveni hungadonan di activa y hunga weganan bendi sea riba DVD of download, e comision a bisa. Yabinan di activacion di Steam a preveni cu e weganan a traha pafo di Republica Checo, Polonia, Hungria, Romania, Slovakia, Estonia, Latvia y Lituania, a bisa.
“Practicanan asina ta priva consumidornan Europeo di e beneficionan di Mercado Digital Singular di UE y e oportunidad di busca rond pa e miho oferta dentro di UE”, vice-presidente ehecutivo, Margrethe Vestager, e vigilante di competencia di e bloc, a bisa den un declaracion.
E restriccionnan di geo-blokeo a afecta alrededor di 100 wega y a dura te november 2018. Valve, cu a ricibi boet di 1.6 miyon euro, a nenga di coopera cu e investigacion, e comision a bisa.
Sinembargo, Valve a bisa cu a ‘coopera completamente’ cu investigacion di e comision door di duna tur evidencia y informacion solicita. “Nos ta den desacuerdo cu e hallazgonan aki y tin plan pa apela e decision”, vice-presidente di Marketing, Doug Lombardi a bisa via e-mail.
E fabricantenan di e weganan – Bandai Namco, Capcom, Focus Home, KochMedia y ZeniMax – tur a coopera y a ricibi descuento riba nan multa, e comision a bisa.
