(AP) — Brasa ehecutivo di Union Europeo a critica fuertemente e representante di e bloc na Austria pa acusa e pais di paga “placa di sanger” na Rusia pa suministronan di gas, y a bisa ayera cu a dun’e orden pa bolbe Brussels.
Representante di UE, Martin Selmayr a bisa durante un evento diaranson cu Austria ta continua ricibiendo 55% di su gas for di Rusia – pero el a nota cu ningun persona na Ringstrasse boulevard den centro di Vienna protestando esaki, segun Agencia di Prensa Austriaco a reporta.
“Esey ta sorprende mi, pasobra ta mandando placa di sanger na Rusia tur dia hunto cu e pago di gas,” Selmayr a bisa, segun e reportahe. El a agrega cu e ta compronde e problema di suministro di energia, pero cu Austria ta un pais rico y por, manera otro nacionnan, keda sin gas Ruso.
Partido Libertad di oposicion di ultra-derecha Austriaco, cu a lidera encuestanan recien prome cu eleccion nacional proximo aña, a haci yamado riba gobierno pa exigi retiro di Selmayr. Diahuebs, ministerio di Exterior Austriaco a bisa cu a yama Selmayr pa un reunion cu un di e oficialnan top di e ministerio.
Na Brussels ayera, vocero di Comision Europeo, Balazs Ujvari a nota cu UE conhuntamente a acorda pa reduci importacion di gas for di Rusia y poco poco stop nan, y cu Austria tambe a subscribi na e esfuerso aki. “Diplomacia no ta djis tocante contenido sino tambe tocante e tono corecto,” Ujvari a bisa, agregando cu enviadonan na cualkier di e 27 pais miembro di UE “mester evalua cada palabra cuidadosamente, pasobra nan ta hunga un rol importante como mensaheronan confia entre nos y e gobierno anfitrion.”
“E escogencia di palabra di e cabesante di nos representacion na Austria no tabata solamente innecesario sino inapropia,” el a bisa, agregando cu a yama Selmayr back na Brussels pa un discusion cu herarkia di UE.
Selmayr tabata un protegido di ex-presidente di Comision, Jean-Claude Juncker y a crece te bira un figura poderoso tras di escena na Brussels tempo cu Juncker a dirigi e ehecutivo di UE entre 2014 y 2019. E ciudadano Aleman a studia pa abogado.
Hasta mientras e comentarionan di Selmayr a genera critica, minister di energia Austriaco a reconoce cu e pais ainda ta usando demasiado gas Ruso, segun APA a reporta. A bisa cu Austria tabata ricibi 80% di su gas for di Rusia prome cu e guera na Ucrania a cuminsa aña pasa, y a reduci esaki, cu suministro di tuberia Ruso contando pa un averahe di 50% di importacion di gas entre augustus di aña pasa y juli. Ta spera pa stop e uso di gas Ruso pa 2027.
