(AP) — Rusia a bisa cu a contraresta un atake di drone contra e Kremlin trempan ayera, yamando esaki un intento fracasa contra presidente Vladimir Putin y primintiendo represalia pa loke a considera como un acto terorista.
E presidente Ucraniano a rechasa esaki, bisando: “Nos no ta ataca Putin ni Moscu.”
Putin no tabata na e Kremlin na e momento di e atake sino na su residencia Novo-Ogaryovo pafo di Moscu, segun su vocero Dmitry Peskov a bisa agencia noticiero estatal Ruso, RIA Novosti.
No tabatin verificacion independiente di e atake, cual autoridadnan Ruso a bisa cu a tuma lugar den anochi.
E Kremlin a bisa cu ehercito Ruso y forsanan di seguridad a stop e dronenan prome cu nan por a ataca. Niun persona a resulta herida, a agrega. Su website oficial a bisa cu restonan di e dronenan a cay riba tereno di Kremlin sin daño.
Presidente Ucraniano, Volodymyr Zelenskyy durante un bishita no anuncia na Helsinki pa combersacion cu e lidernan di cinco pais Nordico, a rechasa cualkier envolvimento. “Nos ta bringa den nos teritorio. Nos ta defendiendo nos pueblo y ciudadnan,” el a bisa na un conferencia di prensa.
Pentagono ta investigando e atake, segun un oficial Mericano kende a papia di forma anonimo pa discuti asuntonan sensitivo. Oficialnan di inteligencia Mericano tambe tabata investigando e acusacionnan Ruso pero ainda no a haci un determinacion, segun un oficial Mericano familiar cu e asunto.
E atake lo ta un escalacion significante den e conflicto di 14 luna, cu Ucrania hibando e guera den curason di poder Ruso. Phillips O’Brien, profesor di estudionan strategico na Universidad di St. Andrews, a bisa: “Sigur e no tabata un intento pa asesina Putin pasobra e no ta drumi riba e dak y probablemente e nunca ta drumi den e Kremlin.” El a agrega cu ta mucho trempan pa proba of desproba cu tabata un intento Ruso “sea pa pone Ucrania mustra impulsivo of pa reforsa opinion publico Ruso,” of si tabata un operacion Ucraniano pa bergonsa Rusia.
Kremlin a bisa cu a planea e atake pa interumpi Dia di Victoria, cual Rusia ta celebra den Red Square riba dia 9 di mei a conmemora e derota di Alemania Nazi den Segundo Guera Mundial. Peskov a bisa cu e parada lo bay door segun programa.
