Nos por a tuma nota di e protesta di taxista contra un posibel yegada di e sistema di taxi Uber, cu na hopi pais caba ta un competencia serio pa taxi regular. Na varios pais a yega tambe na confrontacion entre taxista y nan ‘coleganan’ di Uber, cu nan ta considera pirata.
Henter e fenomeno di Uber ta ilustra bon, con un innovacion tecnologico por influencia un cierto servicio estableci pa hopi aña, cu nos tur ta custumbra cun’e y talbes no ta pensa cu algun dia e panorama den e sector ey por cambia. Pero, esey ta implica acaso cu nos mester permiti e entrada di un sistema di taxi asina sin mas, pasobra e ta funciona den e otro paisnan?
Ta importante pa tira un bista riba e situacion legal, pero tambe esun practico pa imagina ta con algo asina lo mester bay funciona, si acaso e ta posibel mes.
Pa cuminsa cu esaki, mester analisa e situacion na Aruba, kico ley ta permiti. Pa por opera un taxi, na Aruba un persona lo mester di un permiso, bao di Ordenanza encuanto Transporte di Persona (Landsverordening Personenvervoer). E permiso corespondiente, segun articulo 7 di e ley, ta ser duna segun e regla actual, solamente na persona di nacionalidad Hulandes y alabes naci na Aruba, cu tin nan residencia na Aruba, y na Hulandes, naci pafo di Aruba di mayornan naci na Aruba, cu tin nan residencia di hecho na Aruba durante por lo menos binti aña. E mesun regla ta conta pa persona cu ta desea di maneha un autobus chikito. Tambe e articulo ta stipula cu ta otorga e permiso solamente, si e tenedo di e permiso pa taxi o autobus chikito mes ta actua como chauffeur di e vehiculo y cu e operacion di e vehiculo pa su persona lo ta su fuente mayor di entrada. Sin un permiso, no ta permiti opera un vehiculo pa duna e servicio di transporte describi den e ley aki.
Esey ta e ley, cu ta laga bon cla cu sin permiso no por tin e vehiculo riba caminda. Esey ta implica cu introduci un sistema di taxi, cu no tin permiso pa cada vehiculo envolvi, ta ilegal y lo mester ta suheto na control y seguidamente prohibicion pa opera. Bo no por evita cu un hende por set up un sistema di servicio digital di ofrece taxi, crea e sistema di credito cu bo ta paga adelanta, y bo ta pidi un taxi disponibel cerca di bo digitalmente, pero e taxi lo mester ta uno legal. Pregunta: kico lo pasa si un grupo di taxista legal cera cabes y organisa un servicio digital, estilo Uber y ta facilita e pago digital y e administracion debido di esaki, esey ta ilegal?
Si en cambio e idea ta pa set up un sistema di servicio digital, pa bay core cu taxi ilegal, cu no ta tuma na cuenta cu nos tin un sistema legal unda transporte publico ta mara na regla estricto, anto simplemente e autoridadnan concerni mester haci nan trabao, mescos cu actualmente nan mester haci nan trabao pa cu e taxistanan ilegal cu ta florece na grandi riba nos isla. Nos no tin tanto confiansa cu esey lo bay logra tampoco, sino lo nos a mira mehoracion caba den mantene e pirateria di taxi bao control, loke no ta e caso. Pero aki nos ta toca un punto interesante, y esey ta e pregunta dicon nos tin tanto taxista clandestino, riba un isla chikito asina?
E contesta ta hinca den nos situacion teritorial. A pesar cu nos ta un isla chikito, nos tin un area urbanisa bastante grandi, practicamente henter e teritorio pafo di Parke Arikok conoce cierto grado di urbanisacion. Un di e motibonan pakico no mester a laga un parti grandi di e isla bira teritorio urbanisa ta cu e ta trece gasto hopi grandi cu esaki pa loke ta infrastructura. Costo halto di sistema di cable y tuberia, caretera, etc. pero tambe un poblacion relativamente chikito plama riba un teritorio grandi, casi 100 km cuadra, unda ta casi imposibel pa organisa un servicio di bus regular. Si nos compara nos situacion cu un ciudad na Europa, unda un poblacion di 100.000 habitante ta biba den un ciudad di apenas 30 o 40 km cuadra, ta di comprende cu aya ta mas factibel pa organisa un sistema di bus rendabel. Cierto problemanan cu Arubus tin ta simplemente structural.
Y kico ta e consecuencia di tur esaki? Imagina bo cu bo ta biba leu di e liñanan regular di bus y ademas bo mester ta tempran na un di e hotelnan grandi na Palm Beach. Bo no ta acepta e oferta di e taxi clandestino cu ta bin busca bo na cas y ta hiba bo te den porta di trabao? Ademas, e servicio clandestino aki ta funciona cu… celular. Si bo tin internet, bo por comunica cu Whatsapp, sino estilo pica piedra cu sms, pero tin comunicacion, y servicio. Y esey ta crea un base pa taxi clandestino, y si nada cambia, tambe pa Uber clandestino, pasobra manera cos ta awor, no mester di spera tanto di e departamento concerni.
