ESTADONAN UNI – Fiscal a determina diamars cu Uber no lo wordo haci criminalmente responsabel pa e morto di un peaton na Arizona na maart aña pasa. Un di e vehiculonan autonomo di e compania a dal Elaine Herzberg, di 49 aña di edad, kende despues a fayece pa motibo di su heridanan.
“Despues di un revision profundo di tur e evidencia presenta, e oficina aki a determina cu no tin base pa lanta responsabilidad criminal pa e corporacion Uber”, abogado di Yavapai County, Sheila Sullivan Polk, a bisa den un carta.
Uber a nenga di duna comentario.
Polk a pidi pa mas investigacion riba e video ‘dashcam’ di e accidente, y di kico e chauffeur di apoyo, kende lo enfrenta cargonan di homicidio vehicular, por a mira durante e accidente. Polk no tabata disponibel pa comentario.
Vehiculonan autonomo tin un chauffeur di apoyo pa interveni den caso di emergencia. Polis a bisa Reuters cu e chauffeur den e incidente aki tabata mirando un episodio di The Voice na momento di e accidente, y no tabata mirando e caminda.
