Binti dia despues cu e plataforma a detene su operacionnan na e pais, Uber a regresa na Colombia pa presta su servicio. E aplicacion a cambia su modelo pa evita e fayo di Superintendencia di Industria y Comercio (SIC) luna pasa.
Awor, bou un modelo nobo, usuarionan y conductor lo keda respalda pa un contract pa biahe bao e figura di huur, arrendatario y arrendador. Asina, Uber ta mantene cu no ta un aplicacion di transporte sino di servicio di tecnologia, cual ta sigui cu e banda contrario di Ministerio di Transporte Colombiano, cu ta afirma cu pa haci e servicio aki lo mester construi un empresa di transporte.
Den e contract nobo, cu usuario y conductor ta apoya, e empresa ta afirma cu ‘bo ta reconoce y acepta cu Uber ta un proveedo di servicio di tecnologia, cu no ta ofrece servicio di transporte, no ta funciona como transportista ni ta opera como agente pa transporte di biaheronan”.
E regreso lihe di Uber na Colombia no solamente a tuma e gremio di taxista pa sorpresa, cu a faborece e fayo cu SIC a duna di expulsa e empresa di tecnologia di e pais, sino cu tambe autoridadnan Colombiano como Ministerio di Transporte y e mesun super intendencia a keda sorprendi.
Di su banda, ministerio di Transporte a bisa cu ta avansa cu un analisis huridico pa evalua e pasonan cu lo sigui cu e modelo di Uber nobo.
Pa e motibo aki, e taxistanan a anuncia un welga nacional cu lo cuminsa dia 16 di maart proximo, den cual shete asociacion di taxista a uni asina como tambe doñonan di auto.
Mientras tanto, e Colombianonan por bolbe usa Uber, ya cu lo sigui den e linea legal of ilegal tanten lo haya un solucion definitivo riba e tema aki.
