Accionnan di rednan social y otro companianan tecnologico a cay dialuna memey di e resultadonan di e manifestacion na e U.S. Capitol di sostenedonan di presidente Donald Trump.
Twitter diabierna ultimo permanentemente a shut down @realDonaldTrump, citando preocupacion cu Trump lo usa e plataforma pa ‘incita na mas violencia’. Trump a contesta cu e lo ta ‘construyendo nos propio plataforma den futuro cercano. Nos no lo ser SILENCIA!’
Tin un riesgo aumentando pa companianan di tecnologia, specialmente rednan social, cu Congreso lo purba controla nan despues di e accion siman pasa na Washington, D.C.
Parti di e atake riba e Capitol a ser discuti y planea riba rednan social, dunando bida nobo na proteccionnan duna na companianan manera Twitter y Facebook bao Seccion 230. Seccion 230 di e 1996 Communications Decency Acts ta protege companianan cu por host triyones di mensahe di ser demanda pa cualkier persona cu ta ofendi pa algo cu otro persona a post – sea e keho ta legitimo of no.
Twitter Inc. tabata esun mas afecta, cayendo mas di 10% na dado momento. Pa merdia, sinembargo, accionnan tabata abao alrededor di 4%. Facebook, cu a suspende cuenta di Trump for di dia 20 di januari y posiblemente pa semper, a cay 2%.
Tabatin un protesta pafo di edificio sede di Twitter na San Francisco, pero esaki no a conta cu mucho participacion. E edificio mes ta bashi en gran parti pasobra ehecutivo- y empleadonan ta trahando remotamente for di cas pa casi un aña caba, debi na e pandemia.
Parler, conoci como un plataforma amistoso pa ultra-derecha, a ser elimina for di e tiendanan di app di Google y Apple, mientras Amazon a elimina esaki for di su servicio di web hosting poco despues di mey anochi ora Pacifico dialuna. Accionnan di Apple a cay 2%. Amazon y Alphabet, compania mama di Google, ambos a cay menos di 2%.
Sostenedonan di Trump a argumenta cu e accionnan di e companianan tecnologico ta un violacion di libertad di expresion, y Trump pa largo a purba di elimina Seccion 230. Maske mandato di Trump ta termina den ocho dia, poder den Senado a pasa na e Democratanan, kende pa largo a critica e influencia exagera di rednan social.
