Twitter ta bisa cu a alcansa un acuerdo di inversion cu Silver Lake y Elliott Management cu lo laga Jack Dorsey como CEO di e red social.
Twitter Inc. a bisa ayera cu Silver Lake lo haci un inversion di $1 biyon den e compania. Ta spera cu lo pone placa aki, hunto cu cash na man, destina pa cumpra bek $2 biyon di stock.
Elliott Management Corp., cu ta doño di 4% di stock di Twitter, lo haya un asiento den hunta di Twitter. Silver Lake tambe lo haya un asiento.
Anteriormente, reportenan den medionan di comunicacion a sugeri cu Elliott tabatin plan pa nomina cuatro persona na hunta di Twitter y retira Dorsey. Pero e acuerdo nobo ta hacie probable cu Dorsey lo keda. Twitter a cay atras compara cu Facebook y Google pa cu aumento di usuario y entrada di aviso. CEO Jack Dorsey a bandona e compania pa cuminsa e compania di pago Square Inc., pero a bolbe na 2015. Awo e ta reparti su tempo entre Square y Twitter.
Siman pasa e compania a bisa cu tabata test ‘Fleets’, un tweet cu ta disparce den 24ora, como un respuesta na criticonan cu a bisa cu Twitter no a introduci caracteristicanan nobo na su producto. E caracteristica ta similar na ‘stories’ di Instagram y Facebook, y ‘snaps’ di SnapChat, cu ta permiti usuarionan post potret y mensahe cu bida cortico. Caracteristicanan asina ta cada bes mas popular entre usuarionan cu ta prefera gruponan mas chikito y combersacionnan mas priva.
