Twitter ta bisa cu ta tumando accion contra cuentanan y contenido relaciona na QAnon, e teoria di conspiracion ultraderechista, popular entre sostenedornan di presidente Mericano, Donald Trump.
E medidanan ta inclui suspende cuentanan asocia cu contenido QAnon, como tambe blokea URL asocia cune di wordo comparti riba e plataforma. Twitter tambe a bisa cu lo stop di resalta y recomenda tweetnan asocia cu QAnon.
“Nos a bisa claramente cu nos lo tuma accion fuerte di cumplimento riba comportamento cu tin potencial di conduci na daño offline”, e compania a bisa den un tweet diamars. Cuentanan cu ta ‘participa den violacion di nos politica di multi-cuenta, coordina abuso rond victimanan individual, of ta purbando di evadi un suspension anterior’ lo keda prohibi permanentemente, Twitter a bisa.
A elimina mas id 7mil cuenta durante ultimo simannan pa e sorto di violacionnan aki, e compania a bisa den un declaracion. Tambe ta spera cu mas di 150mil cuenta globalmente lo tin visibilidad reduci pa motibo di e medidanan aki.
E teoria di conspiracion QAnon ta centra riba e creencia falso cu Trump ta den un guera secreto contra enemigonan den e ‘deep state’ y un ring di traficacion sexual di mucha cu pedofielnan satanico ta maneha. Pa mas di dos aña, siguidonan a investiga pistanan cu un supuesto oficial di rango halto di gobierno, conoci solamente como ‘Q’, ta post.
E teoria a cuminsa den un skina scur di internet, pero ta cuminsando aparece den e arena politico di coriente popular. Trump a retweet cuentanan promoviendo QAnon y su siguidonan ta yega su rallynan bistiendo paña y pechi cu simbolo y slogan di QAnon.
E movida di Twitter ta sigui den stapnan di Facebook, cu na mei tambe a elimina varios grupo, cuenta y paginanan contra QAnon.
