Autor di ‘Harry Potter’, J. K. Rowling ta enfrentando critica pisa despues cu el a post un serie di tweet tocante hende transgenero.
Rowling a crea polemica diasabra riba Twitter, na momento cu el a critica un piesa di opinion di Devex cu a usa e frase ‘hende cu tin menstruacion’.
“Mi ta sigur cu tabatin un palabra pa e hendenan ey”, e famoso autor Britanico a tweet. “Un hende yuda mi. Wumben? Wimpund? Woomud?” el a tweet, haciendo referencia na ‘women’.
El a continua papiando riba e concepto di sexo biologico. “Si sexo no ta real, no tin atraccion na mesun sexo”, el a tweet. “Si sexo no ta real, e realidad di bida di muhenan rond mundo ta elimina. Mi sa y conoce hende transgenero, pero eliminando e concepto di sexo ta elimina e habilidad di hopi persona di discuti nan bida di forma significativo. No ta odio pa papia berdad.”
Tweet di Rowling a causa un furor di respuesta di comunidad LGBTQ y otronan cu tabata molesto cu su palabranan. Un grupo di fanatico di Harry Potter a tweet nan desacuerdo cu post di Rowling y a curasha su siguidonan pa haci donacion na un grupo cu ta duna sosten na muhe transgenero color scur.
Rowling a bisa cu e ta respeta ‘e derecho di tur persona transgenero pa biba di cualkier forma cu ta sinti autentico y comodo pa nan’. El a continua bisando cu e lo marcha ‘si bo lo ser discrimina a base di ta transexual. Na mes momento, mi bida a ser forma door di ta femenino. Mi no ta kere ta odio pa bisa esey’.
GLAAD a duna un respuesta riba Twitter, tachando e tweet di Rowling como ‘no corecto y cruel’. E grupo defensor dedica na igualdad di LGBTQ a pidi esunnan molesto pa comentarionan di e autor pa duna sosten na organisacionnan cu ta yuda hende transgenero color scur.
“JK Rowling ta sigui alinea su mes cu un ideologia cu ta distorciona hechonan tocante identidad di genero y persona cu ta transexual a proposito”, GLAAD a tweet. “Na 2020, no tin excuus pa ataca persona trans.”
Comments are closed.