Mocion pa Hulanda sigui brinda ayudo humanitario na paisnan CAS (Corsou, Aruba y St. Maarten) no a haya sosten durante votacion di Tweede Kamer e siman aki, pero e peticion di Sylvana Simons di Bij1 pa Hulanda dispensa e debe cu Hulanda a duna e paisnan den forma di sosten di likides a keda wanta.

Manera ta conoci, e Parlamentario di Bij1 a entrega un mocion unda ta pidi Gobierno di Hulanda pa considera pa kita e obligacion di Corsou, St. Maarten y Aruba pa paga e sosten di likides ricibi. Den su mocion, e miembro di Tweede Kamer a bisa cu e paisnan autonomo den Reino, cu ta Corsou, St. Maarten y Aruba a keda desproporcionalmente mas duro afecta pa e pandemia di COVID-19 compara cu Hulanda, y cu nan a ricibi prestamo den forma di sosten di likides pa absorbe e slanan fatal na nivel economico y social pa motibo di e crisis.

Den concepto di e Parlamentario, e sosten di likides tabata necesario pa e ciudadanonan di e tres paisnan por a sobrevivi e crisis, di forma cu no ta pusha e populacionnan den pobresa, percurando pa nan keda cu acceso pa e necesidadnan di bida basico. Ademas, Simons a bisa den su mocion cu ainda economianan di e tres paisnan no a recupera di e crisis di corona, ademas cu hasta prome cu e pandemia ya caba tabatin hopi pobresa y cu e obligacion pa bolbe paga e prestamo lo saca placa di e tres paisnan cu ta necesario pa absorba e efectonan economico di e pandemia pa e proximo añanan. Sylvana Simons a pidi Gobierno Hulandes pa mira den ki forma lo por dispensa e tres paisnan di e obligacion pa paga e debe na Hulanda.

Su otro mocion pa sigui brinda sosten pa alivia pobresa den forma di ayudo humanitario, entrega hunto cu Marieke Koekkoek di Volt si a keda rechasa.

Sector di cultura

Di su banda, miembro di Tweede Kamer Jorien Wuitte di D66, hunto cu Don Ceder di Christen Unie, Laura Bromet di Groenlinks y Simons pone atencion na e asina yama empresarionan cultural riba e tres islanan cu ta esnan mas afecta pa motibo di caida di turismo y sigur tambe e medidanan di mitigacion contra e pandemia. Segun Wuitte, e grupo aki mester di sosten tecnico y opcion di financiamento.

Ademas, e sector cultural por brinda un contribucion importante den diversificacion di economia di e islanan, mientras cu e sectornan aki, di tur cuater pais den Reino lo por sostene y enrikece otro. Como tal, Wuitte a pidi Gobierno di Hulanda pa busca bou cua condicion, e servicio di Cultura y Empresaria (Cultuur + Ondernemen) cu recien a bira disponible pa islanan BES, tambe por ta accesibel pa Corsou, St. Maarten y Aruba. E mocion aki a keda acepta pa Tweede Kamer.

Miembronan Bromet y Koekkoek kendenan a referi na e rapport recien di Amnesty Internacional riba e situacion di buscadonan di asilo na Corsou a entrega un mocion pa Hulanda condiciona e cuido di frontera na paro di cualkier trapamento di derecho humano, y ofrece acceso na un procedura di asilo cu ta den liña cu e Tratado di Nacionnan Uni pa Refugiado.

Manera ta conoci, Amnesty Internacional a constata cu Corsou ta stroba acceso na e procedura di asilo, cu ta pone cu esnan cu ta busca ayudo ta keda deteni sin ningun proceso. Ademas, cu a base structural a constata maltrato y abuso di e personanan aki. Mirando cu Hulanda ta yuda Corsou y Aruba financia e cuido di frontera y como tal, ta contribui na un sistema cu ta trapa structuralmente derechonan humano. E peticion aki a keda rechasa pa Tweede Kamer. Di otro banda, e otro mocion pa pidi Gobierno Hulandes pa bin duna informacion por escrito riba resultadonan di e rapport si a keda acepta.

Locual tambe a pasa ta e mocion di miembro di Christen Uni, Ceder, cu a pidi pa Hulanda yuda mehora e señalamento di traficacion di hende y percura cu ta ataca e problema aki riba e islanan, mescos ta trata e mocion di Koekkoek pa sostene sociedad civil cu ta traha riba proteccion di derechonan humano.

BSN pa studiantenan di Caribe

Algo importante pa tur studiante di e islanan den Caribe ta e mocion pa percura pa nan por haya nan BSN nummer prome cu bay studia na Hulanda. E parlamentario Bromet, cu a haya sosten di coleganan Wuite, Ceder y Kuiken, a pidi en particular pa studiantenan di Caribe Hulandes (Islanan BES) por haya nan BSN nummer pa evita problemanan na momento cu nan mester bay studia na Hulanda. A acepta e mocion aki. Mester bisa cu Secretario di Estado Raymond Knops a bisa cu ta considera e proceso pa studiante di Corsou, St. Maarten y Aruba tambe cu tambe ta confronta complicacion na momento di biaha pa Hulanda y mester di nan number.

Manera Bon Dia Aruba a mustra caba, Secretario di Estado Knops a bisa cu e Ministerio pa Asuntonan Interior ta trahando cu Minister di Enseñansa riba e problematica aki, y a bisa cu ‘ tin work-arounds’ cu ta permiti e studiantenan di nos paisnan toch pidi un financiamento di estudio na DUO sin nan BSN. Pa loke ta e otro areanan cu nan ta confronta problema pa falta di e BSN, ainda no tin un solucion structural pero ta buscando otro proceduranan ‘work-around.’” E Secretario di Estado a bisa cu ta buscando forma pa percura cu no solamente studiantenan di Islanan BES, pero tambe di Corsou, St. Maarten y Aruba lo por haya nan BSN prome cu nan yega Hulanda. “Mi a busca di sa si e ta posibel pa por haya nan BSN sin cu mester adapta ley. Pero esey no ta e caso. Awor nos ta trahando cu Ministerio di Enseñansa pa soluciona e problema aki.” E Secretario di Estado a contesta e pregunta aki particularmente despues cu varios Parlamentario Hulandes a usa e declaracion di Ombudsman nacional den su rapport ‘Preocupacionnan di Studiantenan Caribense,” unda a ilustra cu logra un BSN ta un di e retonan mas grandi.

Pa loke ta e mocion di de Graaf di PVV pa Hulanda percura cu ta finalisa e proceso di decolonisacion di e paisnan Hulandes den Caribe, de facto, pa e islanan CAS bira independiente, e no a haya sosten di Tweede Kamer.