Den Tweede Kamer a expresa preocupacion tocante e maneho financiero di Aruba, Corsou y St. Maarten durante un debate siman pasa.
Parlamentario Chris van Dam di CDA a pone e tono como reportero di e cuenta anual 2018 di presupuesto di Relacion di Reino, ora el a menciona e estado preocupante di maneho financiero den e paisnan di ultramar den Reino durante su presentacion.
“Administracion financiero mester ta den ordo”, Van Dam a bisa, notando cu e preocupacion ta comparti ampliamente, no solamente den Tweede Kamer, sino tambe cerca CFT, Conseho di Minister, y e diferente camaranan di supervision.
Parlamentario André Bosman di VVD a bisa cu e ta mirando tiki progreso den e nuebe aña cu e ta miembro di e Comite di Relacion di Reino. “No tin suficiente boluntad politico pa drecha maneho financiero. Na 2010, nos a paga 1.5 biyon euro pa paga debe nacional di Corsou, y awo un crisis financiero nobo a lanta.”
Bosman a menciona St. Maarten relaciona cu cumplimento di ley: “Claro cu ta teribel locual horcan Irma a haci, pero e problema cu e prizon di Pointe Blanche no ta nobo. Nos a trece esaki dilanti pa añanan, pero St. Maarten no a actua, y a nenga di pone suficiente fondo disponibel pa cumplimento di ley.”
Bosman a critica Aruba pa anula e rol di e Comite pa Supervision Financiero pa Aruba, CAFT, y a bisa cu Aruba ta na bispo di ‘junk bond status’ si nos sigui ‘destrui’ supervision financiero mientras ta aumenta debe nacional. “E pais ta casi bancarota, mi no ta mira progreso.”
Knops a comparti preocupacion specialmente pa financia di Aruba despues cu parlamento a haci un cantidad di cambio na e ordenansa nacional di supervision financiero. “CAft lo no reporta na Conseho di Minister di Reino mas, sino na parlamento di Aruba. Mi miedo ta cu esaki lo tin consecuencia pa Aruba den mercado capital internacional”, el a bisa.
E tabata positivo tocante e acuerdo cu Corsou, y a elogia gabinete di Rhuggenaath pa mira e necesidad di maneho solido. El a bisa cu Hulanda no tin intencion di resolve e deficit financiero di Corsou, pasobra esaki ta relaciona cu un asunto interno di pais Corsou. “Pero nos por yuda cu experticio pa nan regla nan cuenta financiero”, Knops a bisa.
Tocante St. Maarten, Knops a bisa cu ya caba prome cu horcan Irma, e pais a reserva mucho tiki fondo pa cumplimento di ley. “St. Maarten ta apoyando demasiado riba Hulanda”, el a bisa. El a nota cu a pone mas medio den presupuesto 2019, y a pidi parlamento di St. Maarten pa asumi su responsabilidad den maneho di presupuesto otro siman.
Knops a bisa cu e ta ‘hopi satisfecho’ cu maneho financiero di Saba. El a bisa cu Saba a expresa deseo pa asumi mas responsabilidad. Esey lo keda regla den e Saba Package, cual lo firma pronto. Pa cu St. Eustatius… ‘nos no t’ey ainda’.
