Den entrevista cu Peggy Tjin, ta skirbi receta y ta presentadora di programa di television Peggy Tjin’s 10-10, cual ta pasa tur dia 2 biaha pa dia na TeleAruba 11:30 mainta y 5:50 atardi. Pronto, Peggy lo tin un espacio diariamente cu su recetanan den Bon Dia Aruba y Aruba Today.
Peggy Tjin 10-10 ta nifica: Menos cu 10 dollar den menos cu 10 minuut, haciendo uzo di productonan organico traha cuminda lihe, facil, cu hopi sabor y saludabel. “Sinembargo tin full un filosofia tras di dje, pasobra e porcionnan ta controla, cual ta e motibo cu e ta asina facil pa wordo haci den 10 minuut. y pa menos cu 10 dollar. Tambe e factor di control di porcion ta locual ta mantene bo saludabel y cual ta tonifica bo. Banda di esaki e cuminda ta mustra maraviyoso, cual ta duna bo hopi gana di come, cual na mes momento ta satisface bo stoma y ta pone bo come menos cual ta resulta den perdida di peso.”
Peggy a continua splicando cu e ta haci uzo di e slogan “menos ta mas” pa e factor di control di porcion. El a continua splicando cu e ta haci uzo di menos ingrediente y un bunita presentacion cual ta mas cual ta haci cu hende ta kere cu nan ta come mas mientras cu e ta menos.
Idea
Peggy a cuminsa cu e idea algun aña pasa, e tabata skirbi receta durante e crisis economico na Manhattan, New York City. E crisis a causa cu e tabata sali hopi menos pa come afo y a cuminsa cushina mas pa su famia. Tabata 4 aña pasa cu el a cuminsa cu e website y tur hende a bira loco cu esaki, el a agrega.
“E shownan 10-10 ta basicamente filma pa hubentud, hende cu ta lucha cu nan peso y obesidad y hende cu ta den e mal custumber di come cumindanan fast food. Pa nan por sali for di e retonan aki y cuminsa cushina saludabel. Dicidi pa bo mes kico bo kier pone den bo cumindanan, menos procesa y mas organico.”
Peggy su programa ta disponibel actualmente na 6 pais cual ta Aruba, Boneiro, Corsou, Sint Maarten, Surinam y Hulanda.
E reaccion cu Peggy ta hayando for di e comunidad local Arubiano ta cu nan ta contento cu Tele Aruba tin e programa aki y cu nan ta gusta e filosofia cu tin tras di e programa y cu nan lo kier sigui wak programanan mas saludabel riba television, Peggy a bisa. Su show ta solamente 5 minuut, cual ta haci cu e ta lihe, trendy, hip y cu un bunita cantica cun’e e ta agrega.
“Hende papiando di dj aworaki manera cu nan ta aworaki, ta nifica cu mi a hala nan atencion. Y ora cu algo hala bo atencion, e ta pone bo cuminsa pensa. Cual ta netamente locual cu mi kier hende pa haci. Pensa riba locual cu bo ta pone den bo boca y con bo por cambia esaki.”
Kico mas?
E aña aki Peggy lo cuminsa graba pa su otro programa Tripel H cual ta para pa Helping Hand at Home, unda cu Peggy mes lo bay cas di hendenan y guianan den e proceso pa cushina un 10-10 cuminda. “Pues si bo tin duda cu bo no por cushina cu e recetanan di riba bo mes, mi mes lo ta eynan cu bo y yuda bo haci esaki. E lo bira manera un programa “reality style” unda cu mi lo cushina un cuminda 10-10 cu locual cu bo tin e momento ey den bo frishider. Henter e idea di su show di 10-10 ta pa bo por wak e prome cu merdia, bay haci bo compras y cushina cun’e atardi.
Concluyendo el a agrega cu por sigui riba Twitter y Facebook y tur cos por wordo mira riba su website peggytjin.com
.jpg "Philipine van Aanholt 26 luga prome dia Laser Radial Weganan Olimpico")
