ORANJESTAD – Turtuga marino tin un existencia di mas di 100 miyon di aña, pero awo nan ta bou menasa. Seis di e shete especie den henter mundo ta clasifica como na peliger di extinsion, hopi biaha debi na e actividadnan humano, manera caza furtiva, destruccion di e luga na unda nan ta pone su neishi, cambio di clima, como tambe actividadnan di operador di watersports, cu varios biaha a causa e morto di e turtuganan.

Aruba ta un destino cu desde hopi aña pasa e turtuganan ta scoge pa bin y pone su webonan na diferente beachnan, asina tambe e personanan cu ta haci buceo por haya na cualkier luga ora nan ta drenta lama. Pero den e momentonan aki, riba rednan social a publica potretnan di un turtuga cu a muri pa via di e choke cu un boto of un jetsky.

Bon Dia Aruba a tuma contacto cu TurtugAruba Foundation riba e problema aki, y nan a splica cu te awo, nan tin registra 3 caso cu un boto a pasa riba un turtuga, cu e chapaleta a corta y mata e turtuga. Di mesun manera, nan a bisa cu esaki ta duna un preocupacion, y hende mester pensa kico por contribui pa baha e riesgo aki, pa asina den futuro e casonan lamentabel asina no lo sigui sucede di manera frecuente.

TurtugAruba Foundation a manifesta cu tin cierto tecnica cu lo por aplica, pero locual nan ta haci como organisacion protector di animal, ta cu ora nan ta haya un turtuga morto, nan ta entrega esaki na oficina di Cites Authority, pa motibo cu turtuga ta un especie protegi, y e fundacion mester traha un reporte cu tur e datonan, como por ehempel, su grandura, unda precisamente a sosode, y asina nan por acumula e dato, pa autoridad y Directie Nature Millieu por tira bista riba e problema y kico nan por preveni pa e futuro. Tambe e fundacion a manifesta cu e peliger di wordo alcansa pa un boto tambe ta conta pa turista of landado local.

Di mesun manera, Sr. Castro Perez di Aruba Reef Care Foundation a expresa cu mester purba conscientisa e piscadonan den momento cu nan ta coriendo specificamente na Arashi, cu ta un luga hopi uza pa haci buceo. El a agrega cu ora el a bay un biaha pa haci buceo, el a haya nuebe diferente turtuga, y asina ta existi mas.

Castro a bisa cu loke nan por recomenda pa tur usuario di boto, por ehempel catamaran, dive shop cu ta hiba hende pa sambuya, yatenan grandi y piscadonan, ta cu nan mester tira bon bista nan dilanti, pa ora nan wak algo y nan no sa kico e ta exactamente, pa hala un banda, ya cu hopi biaha e chapaleta ta corta casca di turtuga, y p’esey nan ta muri.

Henter comunidad mester ta mas consciente. E turtuganan no por hala rosea bou lama, y esey ta e causa cu nan ta subi superficie. Choke cu botonan of jetsky ta un problema cu lo por bira pio, na medida cu e tempo pasa, si e medidanan no ta wordo tuma, y esaki den consecuencia lo por afecta e capacidad di e turtuga pa alimentacion, migracion, y escape di bestianan predador, como tambe su reproduccion.