Aunke pa ley cierto especienan di nos fauna manera turtuga ta proteha, tin hende cu ta sigui jaag turtuga, manera polis maritimo a mustra ayera mainta.

T’asina cu ayera mainta nos a ricibi un comunicado di polis unda ta splica cu polis maritimo a bin topa hunto cu personal di Departamento di Natura y Medio Ambiente (DNM) durante un investigacion pa 12 or y mey restonan di turtuga.

Polis a informa cu hunto cu e boto di polis maritimo BP-2 e personal a bay pa midi na diferente luga e stroom di lama y e cantidad di oxígeno bou awa. Polis a presenta na e sitio mirando cu un melding a drenta unda nan ta bisa cu tabatin diferente casca di turtuga.

Ora a yega ariba e rif enberdad a bin haya 4 casca di turtuga y tambe cabesnan di turtuga. E turtuganan aki ta protegi y lastimamente ta bin encontra e restonan aki. E restonan di turtuga a wordo tuma den beslag pa personal di DNM. E turtuga aki ta un especie cu ta protegi pa e tratado internacional di CITES y alabes pa articulo 6 inciso 1 Natuur beschermingverordening Aruba. Mester recorda cu ta castigabel pa ley pa mata e especie protegi aki y cu tin multanan pisa pa cu esaki.

Edith van der Wal, presidente di Fundacion TurtugAruba a reacciona na Bon Dia bisando cu esaki a tuma luga mirando cu e area ey tras ta scondi, pues no tin mucho control y hende sa cu esaki ta e caso, pues nan ta probecha di haci e actonan ilegal aki ey tras.

Loke ta mas lamentabel ainda segun sra. van der Wal ta cu un di e turtuganan cu a sufri e crimen aki tabata un turtuga basta grandi, cual ta indica cu e lo a tin mas o menos 75 aña bibando. “E ta hopi lamentabel. E tabata bay pone webo pronto.”

Pa preveni esaki den futuro e fundacion ta keto bay sigui conscientisa na scolnan cu esaki ta prohibi, pero mas aleu cu hende no por haci y deshaci cu naturalesa. “Bo ta wak ya caba cu e peso riba naturalesa ta hopi pisa.” Sra. van der Wal a indica cu turtuga ta un di e instrumentonan cu naturalesa tin pa regula su mes, pues turtuga, specialmente e Green Turtle tin e tarea pa come e yerba bou awa ora esaki ta crece dimas. “Anos mes no ta bay haci e trabou aki berdad? E bestianan tin nan funcion den e ecosistema, pues si nos ta tuma nan pa come of mi no sa kico, esaki ta kita e balansa di e sistema ecologico.”

Esaki ta un manera con por wak cu e balansa entre naturalesa y hende no ta na ordo, segun sra. van der Wal. Sinembargo, e presidente di e fundacion a expresa cu lo unico positivo di loke a pasa aki ta cu danki na e accion di polis y DNM ta posibel cu menos hende lo sigui jaag turtuga. “Esaki ta un cambio positivo pasobra e instancianan ta tumando accion.”