Islanan Turks & Caicos ta sufri un invasion di Haiti, segun lider di e opositor partido Progressive National Party (PNP), Washington Misick, mustrando riba e consulado local di Haiti como “posiblemente den colaboracion cu e perpetradornan di e delitonan aki di trafico humano.”
Misick a dirgi su mes na poblacion di e islanan via un video riba Facebook video siman pasa, como respuesta riba e tragedia cu a tuma lugar cu un boto di inmigranto cu a bolter cerca d costa di e islanan, unda 14 persona lo a perde nan bida.
Misick ta bisa den e video cu e ta condena e “mercenarionan cu ta explota vulnerabilidad di e personanan cu ta hende cu poco speransa anto nan ta dicidi di haci cos desespera y ta entrega loke nantin pa scapa di pobresa na Haiti.”
Tambe Misick ta puntra su mes kico e consulado di Haiti ta haci na e islanan. “Nan t’ey pa ta parti di e solucion, o nan ta parti di e problema. Nan t’ey pa yuda e persona pa yega na un lugar sigur, o nan ta colaborando cu esnan cu ta comete delito di trafico humano.” Tambe el a cuestiona eficacia di gobierno pa atende e asunto. E ta critica cu gobierno ta gasta miyones den repatria persona ilegal pero no ta mehora proteccion di frontera pa preveni entrada.
Migracion ilegal pa hopi tempo ta un peso financiero grandi pa gobierno. Premier Sharlene Cartwright-Robinson a bisa cu e gastonan excesivo di repatriacion ta caba cu reservanan cu por a usa pa desaroya e pais mes. Di acuerdo cu Cartwright-Robinson, gobierno di Turks & Caicos a gasta un total di US$ 4.3 miyon den ultimo cuatro aña na repatriacion so.
