Hulanda a pasa den e fin di siman mas turbulento desde hopi tempo. E conflicto cu Turkia cu tabata lanta cabes algun dia caba, a rementa cu tur forsa. A nenga dos ministro entrada na Hulanda pa bin hiba campaña pa nan gobierno, cu ta tene un referiendo pa amplia e podernan di e presidente den nan constitucion.

Gobierno di Turkia no a acepta esaki y a recuri na e insultonan mas infame cu ta existi, yamando Hulandesnan pa nazi y fascista. Esey naturalmente ta bisa mas di e nivel moral di e actual regimen Turco cu e ta bisa algo di e gobierno y pueblo Hulandes. Den e sucedidonan tabatin centenares di persona para dilanti consulado di Turkia na Rotterdam, cu probablemente tabata consisti di hende cu a nace na Hulanda y tin nacionalidad Hulandes y nacionalidad Turco. Pero nan a bin pa apoya ‘nan’ gobierno na Turkia, y tabata contra gobierno Hulandes, cu nan no ta considera ‘nan’ gobierno. A pesar cu hopi di nan a nace na Hulanda y tin e nacionalidad, y ta dispuesto probablemente pa exigi delaster un derecho cu nan por tin na Hulanda, al fin y al cabo, nan ta resulta di ta identifica nan mes cu Turkia. Y ta reivindica ‘derecho’ di gobierno di Turkia pa drenta Hulanda libremente y tene cualkier reunion cu nan ta considera deseabel.

Gobierno Hulandes no a core pa e confrontacion e biaha aki y a para fuerte cu no lo tolera tal reunion, alegando naturalmente ‘problema di orden publico’. Pero ta parce logico cu apenas algun dia prome cu eleccion, ningun di e dos partidonan den gobierno tabata desea di duna Geert Wilders un ‘free ride’ y a uza e ocasion pa mustra un fortalesa cu na varios otro momento nos no a mira. Por ehemplo, ta fresco den nos memoria ainda kico a sucede na Aruba na 2014, tempo cu autoridadnan hudicial Arubano a aresta ‘El Pollo’ Carvajal, cu intencion di extradicion pa Merca. E menasanan di gobierno Chavista, cu no tin e poder militar, ni riba tera, den aire o riba lama pa competi cu e forsanan conhunto di NATO, a keda ‘tuma na serio’, o asina en todo caso ta loke Hulanda ta laga aparenta, y a laga e delincuente internacional aki bay su pais. Tabata mas probabel cu ta e interesnan economico grandi cu Hulanda ta mira na Venezuela cu a domina, na luga di cumpli cu nan aliado Mericano.

Laga un hues y un ministerio publico na Aruba para pa payaso na e momento ey tabata subordena na interesnan di pais Hulanda. Probablemente nunca ademas lo nos haya sa kico tabata e papel exacto di e ‘amigonan’ cu Carvajal tabatin na Aruba den circulonan di gobernacion, ya cu e tabata un bishitante frecuente di Aruba caba sin problema, mientras cu su nomber tabata aparece caba riba lista internacional di persona busca. Pero, di tur manera, den e caso di e confrontacion cu Turkia nos por mira un otro Hulanda, cu ta laga gobierno di Turkia sa bon cla cu no ta aprecia cu e gobierno ey ta pretende di bin hiba campaña politico bao di e personanan. Cu Hulanda pa un gran parti ta considera su ciudadanonan, mientras Turkia ta reclama e derecho di por atende libremente, riba suelo Hulandes, loke nan ta considera nan ciudadano Turco.

Si gobierno Hulandes a para firme contra gobierno di Turkia pa oportunismo electoral, si of no, no ta e asunto mas relevante aki. E hecho ta keda cu nan a dicidi di confronta un pais cu pa henter Europa, y NATO, ta un aliado strategico. Tambe un pais cu tin bastante relacion economico cu Hulanda y Europa. Un pais ademas cu for di añanan 60 tin un tratado di asociacion cu Hulanda, cu tin como consecuencia cu dobel nacionalidad ta posibel, hasta cu Turconan Hulandes ta sirbi den ehercito Turco y despues por bolbe Hulanda trankilamente y biba cu tur derecho di Hulandes.

Awor varios persona ta cuminsa cuestiona consecuencia di e tratado, cu ta duna e ciudadano, cu ta sinti su mes mas Turco cu Hulandes, tur derecho igual cu e otro ciudadano Hulandes. E pregunta di tur esaki ta ki consecuencia lo por tin pa nos den Caribe Hulandes. Nos tin como bisiña un pais cu ta trapa tur derecho democratico cu por existi den e pais mes. Ta imaginabel, sigur den cayente di e lucha politico, cu lo por bay tin intento pa e brasa largo di e regimen autoritario aki purba yega na ciudadano Venezolano, cu pa un parti por ta hende cu dobel nacionalidad tambe.

E pregunta e ora ta si nos ta mira un gobierno Hulandes cu ta para firme, o cu atrobe nos mester supone cu e interesnan economico di un Shell, en bista di e reservanan di petroleo mas grandi di mundo cu Venezuela tin, lo conduci atrobe na trocemento di curpa den tur sorto di birada pa hustifica cu loke nos ta pensa o kier haci, no ta relevante. Cu e situacion politico, economico y social na Venezuela bayendo den direccion peligroso, lo ta bon pa haya sa unda nos ta para.