Dialuna Turkia a anuncia un serie di sancion politico contra Hulanda, relaciona cu e echo cu Hulanda a nenga di permiti 2 minister Turco core campaña na Hulanda. Entre e sancionnan tin un stop na discusionnan politico entre e 2 paisnan y ceramento di espacio aereo Turco pa diplomaticonan Hulandes.
Diputado prome minister Numan Kurtulmus, cu tabata informa periodistanan durante e reunion di conseho di minister, a bisa cu e sancionnan lo ta aplicabel te ora cu Hulanda tuma pasonan pa remedia e accionnan cu Anakara ta considera como un insulto grave. ‘Tin un crisis y uno masha profundo. Nos no a crea e crisis aki”, Kurtulmus a bisa. “Esunnan cu a cre’e mester tuma paso pa remedia e situacion.”
Otro sancionnan ta prohibi embahador Hulandes di drenta Turkia bek y a conseha parlamento pa retira di un grupo amistoso di Hulandes Turco. E anuncio a bin algun ora despues di Ministerio di Asuntonan Stranhero Turco a protesta contra e trato di un minister Turco cu a wordo preveni di drenta un consulado na Hulanda y a wordo escolta pafo di e pais despues di a purba atende un rally politico. Tambe e ministerio a obheciona na loke el a yama uzo desproporciona di forsa contra manifestantenan na un protesta despues. Banda di esey, e minister di Asuntonan Stranhero a wordo nenga permiso pa aterisa y dirigi su mes durante e mesun rally na Rotterdam.
E argumento ta tocante e echo cu Hulanda ta nenga di permiti oficialnan Turco pa campaña eynan pa haya sosten entre Turconan u ta eligibel pa vota dia 16 awo den e referendum cu lo expande President Turco Recep Tayyip Erdogan su poder masha hopi. Mas o menos 400 mil hende cu lasonan cu Turkia ta biba na Hulanda, pero no ta conoci cuanto ta eligibel pa vota. Erdogan a bisa cu e 2 ministernan di gabinete – esun su Asuntonan Stranhero Mevlut Cavusoglu y esun di Asuntonan di Famia Fatma Betul Sayan Kaya, lo pidi corte di derechonan humano Europeo pa interveni relaciona cu nan tratamento. El a añadi cu e no ta kere cu corte lo dicta na fabor di Turkia.
Mas trempan, canciyer Aleman Angela Merkel a sostene Hulanda den su lucha diplomatico cu Turkia, ora cu e hefe di NATO a pidi pa e miembronan di e aliansa pa respeta otro y Union Europeo a urgi Turkia pa trankilisa. Turkia tabatin un disputa similar cu Alemania siman pasa, pero e situacion cu Hulanda ta bin na momento cu e pais ta prepara pa su mesun eleccion diaranson awo, cual tin prome minister Mark Rutte su partido PVV contra e partido anti Islam di Geert Wilders. Merkel, papiando durante un conferencia di prensa na Munich a duna su sosten y solidaridad completo na Hulanda y a bisa cu chercha di Nazi tabata completamente inaceptabel. Erdogan a reacciona rabia riba Merkel su sosten pa Hulanda. El a renoba su acusacionnan cu Alemania ta sostene teroristanan cu ta bringando Turkia y cu e ta sostene e campaña “no” den e referendum Turco, argumentando cu Berlin no kier mira un Turkia fuerte surgi.
“Algun pais di Union Europeo – laga nos no pone nan tur den e mesun saco – desafortunadamente no por soporta Turkia su desaroyo”, Erdogan a bisa. “Lamentablemente, Alemania ta na top di e lista aki. Alemania ta sostene teror na un manera cruel.” El a conseha Turconan cu ta biba na Europa pa no vota pa partidonan cu el a describi como enemigonan di Turkia. Secretario General di NATO, Jens Stoltenberg a urtgi tur miembro di e aliansa pa mustra respet mutuo, pa keda trankil pa evita mas escalacion y haya un manera pa calma e situacion. Neo-Nazismo
Den un entrevista na television, Erdogan a ripiti e insultonan contra Hulanda bisando: “nan Convencion di Vienna ta nan fascismo. Nan Nazismo. Nos por bisa neo-Nazismo.” E tabata referi na e tratado internacional di relacionnan diplomatico di 1961. Turkia ta candidato pa join Union Europeo, a pesar negociacion di e miembresia tin masha poco progreso den e ultimo decada. E pais a bira un partner vital den un acuerdo cu UE pa frena e pasada di refugiadonan y migrantenan di Turkia pa Europa. Omer Celik, Turkia su minister encarga cu Asuntonan di Union Europeo, a bisa dialuna cu su pais lo considera revisa e acuerdo di migracion pa relaha control riba hendenan cu ta yega Europa na pia drenta Grecia of Bulgaria. “Na mi opinion e asunto di pasada via tera mester wordo revisa”, e agencia Anadolu cu ta maneha pa estado a cit’e ta bisa.
Mientras tanto Hulanda a emiti un conseho di biahe pa nan ciudadanonan pa ta alerta y evita aglomeracion na luganan druk na Turkia. Mas trempan den dia, Turkia a convoca Embahada Hulandes su ‘chargé d’affaires’ Daan Feddo Huisinga, na minister di Asuntonan Stranhero, caminda un oficial a dun’e 2 nota di protesta oficial. Ta e di 3 biaha cu un diplomatico Hulandes a wordo convoca asina, desde cu tensionnan a cuminsa entre e 2 paisnan.
E prome nota a protesta con e famia di e minister a wordo trata. E di 2 a protesta e trato di ciudadanonan Turco cu a aglomera pafo di consulado Turco na Rotterdam di diasabra anochi pa diadomingo mainta, bisando cu forsa desproporcional a wordo uza contra hendenan cu tabata haci uzo di nan derecho pa aglomera pacificamente.
