(AP) — Fiscalnan Turco a lansa un investigacion riba un intercambio di criptomoneda ayera pa motibo di acusacionnan cu por a defrauda alrededor di 390mil inversionista di alrededor di $2 biyon.
Oficina di hefe fiscal di Istanbul a bisa cu tabata investigando e intercambio di criptomoneda Thodex despues di kehonan di usuarionan cu no por a haya acceso na nan activonan.
Doño di Thodex, Faruk Fatih Ozer a desactiva su cuentanan riba rednan social y ta kere cu el a huy di Turkia bay Tirana, Albania, segun noticiero Turco, Haberturk a reporta.
Ozer por enfrenta cargonan di fraude y formacion di un organisacion criminal, Haberturk a bisa, agregando cu unidad di crimen cibernetico di polis a listra oficinanan di Thodex na Istanbul ayera. Mientras tanto, agencia di investigacion di crimen financiero di e pais a blokea tur fondo di Thodex, segun noticiero estatal Anadolu Agency a reporta.
Den un declaracion por escrito transmiti via Haberturk y otro medionan Turco, Ozer a rechasa e acusacionnan di fraude bisando cu el a sali di Turkia pa tene reunionnan cu inversionistanan stranhero. El a bisa cu e lo bolbe Turkia ‘den algun dia’ pa coopera cu autoridadnan Turco.
Ozer tambe a insisti cu acceso na e intercambio di criptomoneda tabata temporalmente cera pa permiti Thodex investiga un supuesto atake cibernetico.
Anteriormente e siman aki, Thodex a notifica usuarionan cu lo stop operacion pa seis ora pa mantencion, y despues a extende e periodo aki na 4-5 dia.
Siman pasa, banco central di Turkia a anuncia cu ta prohibi e uso di criptomoneda pa paga pa bienes, bisando cu a presenta riesgonan ‘irevocabel’.
E decision a yega mientras hopi na Turkia a cuminsa usa criptomoneda pa protege nan placa di spaar for di inflacion aumentando y e caida di moneda Turco.
