Turkia ta reagrupando su tropanan alrededor di e ciudad Manbij, den norte di Siria, cu ta ocupa actualmente pa tropanan di e coalicion di milicia mayoritariamente di origen Kurdo, e Forsanan Democratico di Siria (SDF), asina un observador di guera a bisa, mientras medionan Turco a reporta ayera cu tropanan nobo Turco ta crusando frontera entre Siria y Turkia.
E yegada di mas tropa Turco den e area ta sucediendo a pesar cu Turkia a bisa cu lo retrasa un ofensiva riba e forsanan Kurdo den parti oriental di Siria, despues di e sorpresivo anuncio di presidente Trump cu el a dicidi di retira tur militar Mericano di Siria.
Trump a tweet a yera cu e tabatin un yamada telefonico “largo y fructifero” cu e lider Turco Recep Tayyip Erdogan den cual nan a discuti e retirada “lento y altamente coordina” di tropnan Mericano di e area. Esaki ta e di dos conversacion telefonico di e lidernan den 10 dia, mientras militarnan Mericano ta haci lo posible pa traha un schedule pa e salida di mas o menos 2.000 efectivo.
Un declaracion di e presidente Turco a bisa cu e dos lidernan a acorda pa coordina militar y dipomaticamente pa sigura cu e salida di e Mericanonan di Siria no ta conduci na un “bashi di autoridad.”
E agencia di noticia Turco IHA a reporta cu un convoy di tropa Turco, un unidad di comando – a drenta Siria den curso di marduga.
E portavoz di e Conseho Militar di Nabijm dirigi pa Kurdonan, Sharfan Darwish, a bisa cu refuersonan Turco a yega den e area. “Nos ta tumando e medidanan necesario pa defende nos mes si nan ataca nos,” el a declara sin elabora mas aleu. Tropanan Mericano cu base rond di Manbij a patruya den e ciudad y a ser mira papiando cu residente.
