E periodista Turco, Pelin Ünker, a ser sentencia ayera pa un tribunal di Istanbul na un condena di 13 luna di prizon y un multa di US$ 1.615, pa su participacion den e revelacionnan di e investigacion conoci como ‘Paradise Papers’.
Ünker ta miembro di e Consorcio Internacional di Periodista di Investigacion, desde unda el a revela cu e ex-prome ministro Turco Binali Yildirim y su yiunan tabatin compania na Malta. Su investigacion a keda publica pa e diario local Cumhuriyet, tambe multa pa e tribunal bou di e mesun figura di ‘difamacion y insulto’.
E abogado di e periodista, Tora Pekin, a defende e trabao di su cliente como acerta y pa ta di interes publico. Su ekipo a bisa cu e sentencia contra e reportera freelance ta doblemente inhusto pasobra tabatin inclui articulo cu e no a skirbi.
“E Paradise Papers a keda publica como noticia na henter mundo, pero e unico cu ta ser husga ta Pelin Ünker,” Pekin a declara. Ademas, e abogado a bisa cu e tabatin e intencion di apela loke tabata un decision hudicial “extraordinario pero no sorprendente.”
“E hecho ta cu e yiunan di Binali Yildirim tin empresa na Malta. Esey ya a ser acepta, y den e acusacion tambe nan a acepta esey,” Pekin a detaya. En vista di e condena e periodista a publica un mensahe riba su cuenta di Twitter defendiendo periodismo. “Nos no ta spanta como periodista. Pero esey no significa cu nos ta valiente. Manera medico ta cuida su pashentnan, periodista mester cuida interes publico. Mi kier gradici tur cu a expresa mi nan apoyo. Periodismo no ta un crimen.”
Di su banda, e director di e Consorcio Internacional di Periodista di Investigacion, Gerard Ryle, a califica e condena contra Ünker como otro lamentabel atake contra libertad di expresion na Turkia.
