Turkey a bisa diamars ultimo cu nan ta trahando cu Merca pa coordina e retirada di e trupanan Mericano, pero ta keda “determina” pa saca e combatientenan Kurdo, cu tin apoyo Mericano, te awor, di e parti Nororiental di Siria.
Ministro di Asunto Exterior Mevlut Cavusoglu a conta reporteronan cu “si Turkia bisa cu e lo drenta, e lo drenta”, den comentario divulga pa agencia di noticia DHA. Su comentarionan a bin mientras cu tin reporte di rebeldenan Sirio, cu apoyo di Turkia, ta cla pa cuminsa un operacion militar den y alrededor di e ciudad Manbij cu ta controla actualmente pa combatientenan Kurdo.
Pa simannan largo Turkia tabata menasa di lansa un atake contra e combatientenan Kurdo, cu a forma partnership cu Merca pa core Estado Islamico for di mayor parti di parti Norte y Oriental di Siria. Ankara ta mira e forsanan Kurdo como terorista pa nan conexionnan cu un grupo insurgrnte na Turkia.
Presidente Donald Trump a anuncia e retiro planifica di e forsanan di Merca despues di un yamada telefonico di presidente Recep Tayyip Erdogan mas tempran den e luna aki.
Combatientenan di Siria, cu ta haya apoyo di Turkia, a cuminsa move den e area di Manbij y ehercito Turco a continua cu manda tank, artiyeria y otro ekipo pa frontera y un area administra pa Turkia den Norte di Siria, di acuerdo cu informacion di medionan Turco.
E Oservatorio Sirio pa Derecho Humano, un monitor di guera, a bisa cu Turkia a ordena e rebeldenan cu nan ta apoya pa cuminsa un operacion cerca di Manbij “den e proximo oranan.”
“Ta crucial pa Merca no resulta di no ta mantene su promesanan”, Cavusoglu a bisa.
El a argumenta cu Turkia tin e poder pa neutralisa Is riba nan mes y a critica Francia, cu a priminti di keda den Siria a pesar di e decision Mericano di sali.
Cavusoglu a adverti cu esaki lo no beneficia Francia ya cu e ta keda na Siria pa duna proteccion na YPG, e milicia Kurdo mas importante.
Erdogan, papiando cu reportero na Ankara, a bisa cu Turkia a tuma na cuenta e anuncio di Trump mas cu e anucnio di Francia su presidente Emmanuel Macron. E futuro di e coalicion internacional contra IS, cu ta inclui Turkia, Merca y Francia, ta keda incierto.
