Corte mas halto di Turkia ayera a duna veredicto na fabor di Wikipedia, bisando cu e prohibicion di gobierno pa dos aña riba e enciclopedia online ta constitui un violacion di libertad di expresion, segun un agencia noticiero estatal.
Turkia a blokea Wikipedia na april 2017, acusando e plataforma di ta parti di un ‘campaña di desprestigio’ contra e pais, despues cu e website a nenga di elimina contenido cu supuestamente a pone Turkia mustra como dunando sosten na e grupo Estado Islamico y otro organisacionnan terorista.
Acceso na Wikipedia y tur su edicionnan di idioma a ser blokea bou un ley cu ta permiti gobierno prohibi websitenan cu ta considera como representando un menasa pa siguridad nacional.
Wikipedia a nenga di elimina contenido di e website genera pa comunidad, citando su oposicion na censura. A peticiona e Corte Constitucional na mei 2017, despues cu palabracionnan cu oficialnan Turco y un reto den cortenan mas abou a faya.
Agencia Andolu a reporta cu e Corte Constitucional a dicidi cu e prohibicion ta conta como un violacion di libertad di expresion. E huesnan a vota 10-6 na fabor di Wikipedia, e agencia a bisa.
No tabatin comentario inmediato di gobierno y no tabata inmediatamente cla na ki momento lo restaura acceso na e pagina.
Cantidad di Turco a haya manera pa evadi e prohibicion riba Wikipedia y otro websitenan blokea.
