Turistanan tambe a sinti e efecto di protesta di taxistanan

E protesta di taxistanan na comienso di siman a causa un desaster pa loke ta servicio di taxi y trafico en general. Turistanan a sinti e efecto di e protestanan aki y algun a expresa nan frustracion pa e inconveniencia cu e protestanan aki a causa.

Ariba rednan social e turistanan tabata pendiente di e situacion di e taxistanan y algun a conta di nan propio experiencia e incomodidadnan cu nan pasa pa motibo cu no por a haya un taxi pa transporta nan.

Un bishitante en particular a skirbi riba e pagina di Facebook dedica na turistanan di Aruba cu nan tabata di bishita na e isla durante e dianan di protesta y cu esakinan tabata causando desaster y afectando e turistanan.

“E taxistanan ta den welga y ta causando desaster. Nan ta bisa cu nan ta purbando di demostra un punto na gobierno, pero nan ta solamente lastimando e turistanan y e restaurantnan. Nos a keda pega despues di come awe nochi. No tabatin taxi pa bin busca nos. E tabata hopi leu pa cana den anochi riba un caya cu ta druk,” e usuario a indica.

El a sigui splica cu danki na e staff y personal di e restaurant unda nan tabata come nan a logra yega nan hotel back. “Si e welga continua, solamente nos lo por cana pa yega e restaurantnan. Esey lo ta tristo pasobra nos tin hopi restaurant faborito na e isla. E isla feliz ta un tiki tristo aworaki, pero toch nos stima Aruba,” el a bisa finalisando su publicacion.

Un cantidad di otro turista a comenta riba e publicacion aki, cu algun purbando di splica kico en realidad e situacion ta, algun otro a expresa nan apoyo pa e taxistanan y otro usuarionan tambe a vocifera nan frustracion pa e inconveniente cu e protestanan a causa.

“Si e gobierno ta atacando totalmente e industria di taxi, ami lo spera mas welga prolonga. Hopi tristo pa scucha esaki,” ; “Pa con horible cu e por ta pa personanan cu ta bishita e isla, mester bisa cu nos mester ta orguyoso cu nan ta suficientemente fuerte pa uni y ataca. Nan ta demostrando cu hende tin e poder. Definitivamente tin poder den unidad. Mi ta spera nan gana,” ; “Mi ta kere cu tur hende tin derecho na protesta. E gobierno ta wordo eligi pa votadornan. E minister ta hopi irespetuoso cu e taxistanan. E ta lubida cu su trabou ta pa cuater aña solamente. Manera cu cosnan ta wordo haci, e por bisa su trabou ayo,” ta algun di e comentarionan di usuarionan cu ta na fabor di e protesta di e taxistanan

Di otro banda tin e turistanan cu simplemente kier disfruta di nan vakantie sin cu mester encontra inconveniencianan cu lo afecta nan estadia na e isla.

“E ta un perturbacion grandi pa e sustento di henter e isla di Aruba. Autoridadnan mester resolve e problema aki lo mas pronto posibel,” ; “Hopi hende ta depende di e taxinan pa mobilisa na e isla. E isla ta un isla turistico y ora cu hende ta bay cu vakantie nan ta depende hopi di e taxinan. Hopi hende no kier tin e molester di huur un auto y debolbe esaki. Si transporte ta bira un dolor di cabez pa e turistanan, nan ta bay busca otro destinacionnan manera Turks & Caicos of otro islanan den Caribe. Niun hende kier ta cu vakantie y keda pega na un restaurant,” ; “E situacion ta horible cu e protestanan aki, hendenan ta disgusta,” ta algun di e comentarionan di usuarionan cu a expresa nan malcontento pa e situacion cu a tuma luga cu e protesta di e taxistanan.

Mester remarca cu hopi di e turistanan tabata confundi ariba e motibo di e protestanan y e informacion cu tabata circula den e comentarionan di e publicacion mes tabata incorecto. Un gran parti a compronde cu e taxistanan a protesta pa motibo cu a aumenta e cantidad maximo di pasahero cu un taxi por transporta di cinco pa shete, sin conta e chauffeur. Esaki a wordo interpreta manera cu gobierno ta exigi tur taxista pa nan cumpra autonan mas grandi pa por transporta shete persona of cu e taxinan mas chikito no lo por opera mas.

Minister di Transporte, Ursell Arends, tambe a comenta den e publicacion aki clarificando cu esey no ta e caso y cu taxinan cu tin autonan mas chikito cu por transporta cinco persona, sin conta e chauffeur, ta sigui funciona normal. El a enfatisa cu gobierno no ta exigi ningun taxista, cu no tin auto grandi, pa cumpra uno pa por opera como taxi.

Manera ya caba Bon Dia Aruba a bin ta informa, un grupo di taxista ta malcontento cu e introduccion di un maneho nobo pa loke ta trata traspaso di permiso di taxi y e aumento di cantidad maximo di pasahero cu un taxi por transporta.

Cu e maneho nobo aki traspaso di permiso, cual manera tabata custumber pa hopi aña tabata wordo traspasa entre famia of pa un persona di escogencia di e titular di e permiso. Pero den esaki tabatin algun caso di corupcion, minister Arends a informa, caminda e taxistanan tabata bende e permiso di taxi pa sumanan halto, locual ta contra di ley.

E traspaso di permiso di taxi entre famianan of persona di escogencia di e titular di e permiso a crea un sistema cera na unda cierto famianan so ta keda cu e permiso di taxi di generacion pa generacion eliminando asina e posibilidad pa otro ciudadanonan tambe por yega na un permiso di taxi.

E “monopolio” aki ta keda elimina cu e maneho nobo y esaki ta e punto principal di e protesta di e taxistanan.

Minister Arends a enfatisa cu e permiso di taxi no ta un eigendom ni un herencia y ta patrimonio di pueblo. E maneho nobo, el a resalta, ta crea un oportunidad igual pa tur ciudadano cu kier yega na un permiso di taxi, por logra esaki manera cu ley ta prescribi.

Actualmente tur cos ta back na normalidad mientras taxistanan ta en espera di e siguiente reunion cu minister di transporte, minister Arends, cu lo tuma luga dia 16 di augustus. E reunion aki tin como meta pa dialoga ariba diferente punto cu ambos parti a trece dilanti y logra yega na un consensus, un solucion cu lo beneficia tur persona envolvi y cu lo respeta ley.