Recientemente, Gobierno di Aruba a anuncia mediante un comunicado di prensa cu hotel Secrets lo habri pa fin di aña 2024. Pa algun tempo caba, e tema di construccion di hotel Secrets tin comunidad di Aruba dividi, pero cu e anuncio di e apertura di e hotel pa fin di aña aki, turistanan tambe a expresa nan opinion ariba e noticia aki.

Den e comunicado, gobierno a indica cu Prome Minister, Evelyn Wever-Croes a reuni cu desaroyadornan di hotel Secrets na San Nicolas. E desaroyadornan a informa gobierno cu nan trahando pa keda cla cu e prome fase di e hotel pa fin di e aña aki, 2024. Un total di 300 camber ta habri fin di 2024 y e demas cambernan ta wordo dividi den otro dos fase. Fase dos ta e construccion di 300 camber na 2026 y fase 3 ta e construccion di e ultimo 300 camber na 2028.

Gobierno ta considera cu esaki lo bay ta un era nobo pa San Nicolas. “Pa Gabinete Wever-Croes II, desaroyo di San Nicolas ta un prioridad y p’esey ta traha duro pa logra yega na un solucion pa cu e proyecto aki.” Prome Minister a indica cu pa Gobierno e proyecto aki ta uno di gran beneficio mirando cu e lo crea oportunidad laboral y un crecemento economico pa Aruba na San Nicolas y vecindario. Tambe, Gobierno ta invertiendo hopi placa den embeyecemento di diferente area incluyendo Baby Beach y Rodgers Beach.

Aruba su pilar economico ta turismo y gobierno su vision ta enfoca ariba e desaroyo di Aruba como producto turistico y hotel Secrets ta parti di e vision di gobierno pa esaki, pero mayoria di turista a expresa di no ta mucho contento cu e desaroyo aki na Baby Beach.

Ariba un pagina popular pa turistanan cu a yega di bishita of ta bay bishita Aruba ariba e plataforma social Facebook, algun dia atras tabatin un cantidad di comentario ariba un publicacion tocante e anuncio di apertura di e hotel Secrets.

“Masha tristo. Gobierno no por a laga tereno di Baby Beach keda original. Pronto lo tin asina hopi camber di hotel riba e isla y ora nan ta mita gebooked, hende lo keda sin trabao,” un usuario a indica.

Otro ta yam’e “un pena grandi”. E usuario a comenta cu antes Aruba tabata un isla maraviyoso sin tanto hende, pero aworaki, for di su punto di bista, ta hopi yen y e prijsnan na e isla a cuadruplica.

Otro usuario tambe a comenta cu e situacion ta “masha masha tristo,” pasobra e beach lo keda invadi cu huespednan di hotel. “Lo ta imposibel pa cualkier otro persona haya un pida di santo pa disfruta e maraviya aki. Mi ta hopi contento cu por a bishita durante añanan pasa mientras cu no tabata asina yen, mas cu nada e aña aki tabata completamente loco cu e cantidad di hende cu tabata aya,” el a agrega.

Otro persona a expresa cu “ta berdaderamente tragico cu no a pone un prohibicion ariba construccion nobo.”

Varios otro turista tambe a expresa nan malcontento y a remarca cu Aruba a cambia y cu ya no ta bay tin paz na Baby Beach.

“Aruba a cambia asina hopi desde 2016, nos prome biahe. Masha tristo. Mucho hopi hende y auto! PARA E CONSTRUCCION!”; “Un monstruosidad pa mira. Un eror tragico y dramatico. E fin di e beyesa y paz di Baby Beach”; “Ayo Baby Beach, un gusto di a conoce bo”; “Mas destruccion. Matando boso mes for di paden. Corupcion politico y ambicion na su maximo,” ta algun di e otro comentarionan cu e turistanan a laga ariba e publicacion di e noticia aki.

Otro usuario a señala cu for di su punto di bista, ni Baby Beach ni ningun otro beach tin mester di mas hotel y resort. El a remarca cu e aeropuerto ta regularmente yen te na capacidad y cu barconan di crucero “ridiculamente grandi, e isla berdaderamente no tin mester di mas turista.”

“Mi ta desea cu tur cos por a keda manera e ta. E localnan por biba for di turismo, pero e isla ainda no ta wordo explota completamente. Si esaki sigui asina, e Aruba cu nos tur a namora di dje lo termina manera otro lugarnan den Caribe y mientras cu mi semper lo aprecia e momentonan asombroso aya, lamentablemente lo ta tempo pa mi pa no bolbe bek pa loke tabata un di e lugarnan mas feliz riba mundo,” e usuario a agrega.

Un grupo di habitante di Sero Colorado a bin ta protesta pa e magnitud di e proyecto hotel Secrets desde 21 di october 2020. E habitantenan aki semper a haci uso di ley pa adverti Gobierno y indirectamente Three Rivers, cu e proyecto no ta cuadra cu ley y no ta cumpli cu e condicionnan di bienestar pa e bisindario. E habitantenan aki tambe semper a informa gobierno den tratamento di casonan na corte cu nan no ta contra di desaroyo turistico, pero e otorgamento di un permiso di construccion tin cu bay a base di ley y maneho.

A pesar di ta na altura di e advertencia di parti di e habitantenan, Gobierno a bay a tuma e decision di elimina e ley cu tabata protege Aruba di cualkier posibel claim di parti di inversionistanan. Gobierno a elimina e articulo 59 di ordenanza di construccion y Vivienda di Aruba cu tabata automaticamente para cualkier construccion ora cu ricibi un obhecion, y asina proteha Aruba financieramente si un inversionista bin cu un claim miyonario pasobra e obra a para, debi cu ta ley a para e obra y no un decision di Gobierno.

Na Aruba mes, opinion ta dividi riba construccion di e hotel, cu algun ciudadano elogiando e desaroyo na San Nicolas. Entre nan San Nicolas Business Association a para fuerte na fabor di e hotel aki. Recientemente, e asociacion comercial a post riba nan pagina di Facebook comentando riba e anuncio di gobierno. “Ora e hotel aki tabatin su retonan, nos a para band’i nan, nos a bay sinta cu gobierno na varios ocasion, nos a papia cu varios di e bisiñanan, nos a bay Staten defendiendo nan derecho nan di existi, pasobra nos a y sa e importancia di e hotel aki pa trece prosperidad pariba di brug. Un danki di curazon esnan cu a “Say Yes to Secrets”, y na tur otro instancia, compania y gremio, y gobierno cu awe e proyecto aki ta den full swing inaugurando su prome cambernan na December.”

A pesar di continuacion di construccion, e desaroyadornan ainda tin algun caso andando den corte pendiente di resolucion.