Recientemente ariba e pagina popular di Facebook na unda turistanan ta haci pregunta- y recomendacionnan tocante Aruba, usuarionan a bolbe resalta e problema di mal holor pa motibo di e planta di tratamento di awa sushi, RWZI / Bubaliplas.
Manera ta conoci, e problema di mal holor ocasiona pa e planta di RWZI / Bubaliplas ta uno cu tin añas ta causa molester den e area di Eagle Beach y bisindario. Na mas di un ocasion turistanan a expresa nan frustracion y disgusto pa e situacion aki, specialmente esnan cu ta hospeda na e hotelnan den e area aki.
Recientemente un usuario a puntra ariba e pagina aki di Facebook kico ta pasando cu e mal holor den e area di Eagle Beach, y pa esaki, hopi otro usuario a reacciona y a expresa nan opinion den e seccion di comentario.
“E ta teribel! Mi ta asina tristo pa bisa cu mi no por a caba un cuminda. Di baina mi por core pasa den auto eybanda. Ta un area chikito, pero por Dios, e ta un di e holornan mas malo cu tin! Nos ta aki awor… Mi ta di acuerdo, check Barefoot e biaha aki… laga Passions pa un miho dia,” un usuario a comenta.
Otro a resalta cu e construccion durante tur e añanan ta loke ta pone presion ariba e planta di RWZI y locual ta ocasion e mal holor, ya cu e planta no por procesa e cantidad di awa sushi cu ta yega. Durante añanan, tin basta construccion a tuma lugar den e area, y e planta di tratamento di awa no por maneha e cantidad di awa cu mester procesa.
Pero di otro banda, tin turistanan cu ta comenta cu nan experiencia no ta inclui keho di ningun mal holor, aunke nan a keda den hotelnan of a come na restaurantnan den e area cu sa sinti e holo mas fuerte.
E ta depende di e dia y den ki direccion e biento ta supla, pero no por nenga cu e situacion ta laga un mal impresion y ta afecta e vakantie di e turistanan cu ta bin Aruba pa disfruta di e producto turistico optimal.
