Minister Otmar Oduber a bisa cu awor cu Serlimar ta fuerte den servicio y ekipo, a yega e momento pa comunidad cuminsa paga e Afl. 25 pa servicio y asina contribui cu e compania. E facturanan a cuminsa sali caba caminda e persona por cuminsa paga y tin cierto oferta special na beneficio di nan clientenan.
Pero ‘no comunidad so,’ mester contribui. Minister Oduber a agrega cu den e ley cu pronto ta bay parlamento riba maneho nobo di desperdicio y sushi, e turistanan cu ta bin Aruba tambe mester contribui. Igualmente e gremio comercial mester contribui pa loke ta trata e mantencion di limpiesa y maneho nobo di desperdicio di sushi. “Pasobra na final di dia ta nos tur kier biba na un pais cu ta limpi y na unda tin proteccion di medio ambiente,” el a bisa.
Pero mas cu tur –segun e mandatario- nos tur kier biba na un pais higienico y saludabel pa henter comunidad. Durante su ultimo conferencia di prensa, e mandatario a bisa cu Serlimar ta un compania nacional di pais Aruba. Pa ley Serlimar tin diferente tarea of responsabilidad pa realisa, y no solamente recoge sushi den domicilio. Sino cu Serlimar mester percura entre otro tene Aruba limpi y mantene nos infrastructura ordena.
