“Awe aeropuerto ta un desaster, mi a planifica cu hopi anticipacion y nos tin dos ora wardando,” tabata e mensahe cu un turista a post riba rednan social pa trece dilanti su mal contento debi na rijnan largo di spera cu tabatin ayera na Aeropuerto Reina Beatrix.

Aunke tin trabounan di renobacion na aeropuerto cu ta tumando luga for di algun tempo caba, rijnan pa pasaheronan cu ta biaha pa Merca ta algo casi frecuente manera nan ta sigura, un usuario hasta a yega di bisa cu Aruba tin hopi movecion den dianan aki mirando cu tin vakantie di winter na Merca, tambe otronan a mustra confundi debi cu ayera tabata diaranson y normalmente den dianan di siman e aeropuerto ta supone di ta mas accesibel pa biaheronan pero esey no tabata e caso ayera.

Di igual manera, un otro usuario riba e grupo All Things Aruba a trece dilanti cu e tin 20 aña bishitando Aruba y cada biaha cu e mester bay Merca back semper tin rijnan largo na aeropuerto, algo cu pa su persona ta causa hopi ansiedad y cansancio, “Mi ta spera cu por controla esaki pronto, por lo menos e airco di paden” el a sigura.

Segun por a compronde, esaki ta algo cu ta sucede frecuente na unda e turistanan cu ta biaha pa nan pais back mester warda hasta 3 ora prome cu nan mester yega te Aduana, segun un usuario a sigura.

Aeropuerto di Aruba ta den pleno renobacion, manera a menciona caba cu e proyecto Gateway 2030 e cual a ser firma oficialmente na aña 2018 cu un inversion di 275 miyon dollar segun minister di Turismo a sigura den tempo, sinembargo, despues di cambia e situacion a cambia y na februari 2023 e mandatario a sigura cu “Gateway 2030 ta un proyecto di mas di 140 miyon dollar cu lo genera entre 200 y 300 cupo di trabou sea directo of indirecto cu AAA. E proyecto aki lo crea un spin off economico pa pais Aruba y lo trece placa den caha di gobierno a traves di impuesto. Ta un proyecto importante pa e ampliacion y renobacion di e aeropuerto.”

Tambe, minister Oduber a enfatisa cu e proyecto aki ta ser ehecuta pa contratistanan local y mayoria di e materialnan di construccion ta ser cumpra na Aruba mes. Segun planificacion e proyecto aki lo mester ser entrega e aña aki , asina e mandatario a trece dilanti.

Na februari di 2023 Aruba Airport Authority a duna un update y prensa a ser invita pa bishita con e proyecto aki tabata canando na e momento ey cu tabatin 50% di e trabounan realisa.

E fase 1A ta consisti di e expansion di e check in hall pa pasaheronan cu ta biaha pa Merca. E expansion lo zorg pa e hall aki bira e main check in pa tur vuelo cu ta sali for di Aruba, pues esaki ta inclui esnan pa Merca y tambe e NON US departures. E siguiente pasonan den e proyecto aki ta den proceso di evaluacion y ta inclui diferente luga caminda por sinta, come y tambe mas facilidadnan den e parti di yegadanan y salidanan di aeropuerto di Aruba.

Esaki tambe ta inclui e desaroyo y instalacion di sistema di manipulacion di ekipahe y e zona nobo di preparacion di ekipahe.

E fase 1B ta bay inclui e ampliacion di e area actual di gate 8 y e creacion di dos area di sala di espera cu lo ser atendi cu tres gate di contacto y un di embarke. Igualmente a menciona cu nan a hinca mas sostenibilidad como parti di nan strategia y nan a incorpora infrastructura pa panel solar pero tambe otro cosnan como reusa awa di yobida pa flush WC y otro cosnan cu nan kier incorpora.

E proximo fasenan di e proyecto tambe ta wordo evalua na e momentonan aki y lo wordo inclui den e proyecto Gateway 2030, como por ehemplo un area nobo di concesion unda ta e gatenan pa biaha den area Mericano, instalacionnan nobo pa e yegada y ampliacion di areanan di servicio den e terminal di salida.

Minister Oduber a expresa cu a nan como prensa a haya un splicacion amplio di loke ta trata e proyecto Gateway 2030 cu despues di un aña y mey cu trabounan a cuminsa nan ta den 50% di e ehecucion na unda nan ta cumpliendo cu e planning pa e proyecto wordo entrega na su fecha acorda.

Fase 1A ta inversion di 143 miyon dollar manera minister Oduber a sigura y despues lo sigui cu fase 1B, fase 2 y 3 unda cu “e proyecto aki ta hopi importante pa nos turismo, nos economia teniendo en cuenta e limitacion di capacidad cu nos tin na e momentonan aki y teniendo en cuenta e expansion di e cambernan cu Aruba ta experenciando cu varios hotel nobo cu ta den construccion y p’esey ta necesario tambe pa nos amplia nos aeropuerto y percura pa e bon infrastructura pa cumpli cu tur e deseonan di nos bishitantenan,” el a bisa.

Igualmente el a trece dilanti cu e proyecto aki ta wordo ehecuta pa contratistanan local unda por mira con e proyecto ta bayendo lo cual ta duna ehempel na tur otro proyectonan den futuro cu contratistanan local creando cuponan di trabou.