Ariba un pagina di e plataforma social Facebook cu ta dedica na turistanan cu a bishita of ta bay bishita Aruba, un publicacion di un setup di campamento na Rodgers Beach a hala atencion pa su creatividad y arte.
Manera ta tradicion pa hopi aña, Arubianonan ta disfruta di e dianan di vakantie di Semana Santa na lama campando. Un cantidad grandi di Arubiano, famianan completo ta sigui e tradicion aki y ta disfruta di algun dia leu for di nan cas na lama.
Cada aña e campamentonan ta bira mas elabora. Antes esaki tabata sucede cu tentnan solamente y aworaki esaki a pasa bay over na trailernan tambe, y tin di nan hasta cu airco, tentnan elabora y hopi mas. E campadonan ta bay cu tur nan comodidadnan di cas pa asina pasa un dushi vakantie na canto di lama.
Recientemente un setup di campamento specifico a ricibi atencion di turistanan ariba Facebook. Ta trata di un campamento na San Nicolas cu ta resalta pa su creatividad y arte.
“Compartiendo e campamento aki banda di nos na Rodgers Beach awe mainta. El a haci mi smile. Hopi bunita,” e publicacion ta bisa hunto cu un potret di e setup colorido.
E publicacion a ricibi reaccion y comentarionan positivo for di otro turistanan cu a elogia e tradicion largo aki di Aruba.
“Con hopi mi stima e tradicion aki” ; “Mi a gusta e creatividad. Semper nos ta disfruta di Semana Santa”; “Encanta esaki, un tradicion maraviyoso. Stima Aruba,” y “El a pone ami smile tambe,” ta algun di e comentarionan cu e turistanan a laga ariba e publicacion aki.
