ORANJESTAD – Por medio di e tax cu e turistanan crucero mester paga na su yegada na Aruba, lo crea un fondo destina pa e compania Arutram y pa dos museonan na Oranjestad.
Minister Otmar Oduber a bisa cu gobierno tabata negoshando y nan a bin na un acuerdo entre e partinan envolvi caminda a wordo palabra cu fei di 1 di januari awor lo tin un aumento di 1 dollar pa loke ta trata e pasaheronan di barco crucero cu ta bin Aruba.
Ta asina cu 1 dollar di loke e turista crucero lo paga di aumento ta bay pa gastonan di Arutram. E entrada aki lo haci cu practicamente pa 2016 cu un 80%, pero pa 2017 practicamente Arutram lo gosa di un presupuesto balansa cu su gastonan compara cu su entradanan.
E calculacion aki a wordo haci a base di alrededor di 700 mil pasahero na 2016, un dollar cu nan lo paga fei di “passenger facility charge” lo bira mas of menos 1.3 miyon florin. Cu e suma aki practicamente e gasto di Arutram ta wordo cubri pa medio di e entrada cu ta wordo cobra na cada pasahero of turista crucero.
Tambe den e aumento di e tarifa aki cu e turistanan crucero mester paga lo tin un fondo destina pa e dos museonan estableci na Oranjestad. E turistanan aki cu ta paga esaki den su tax di entrada nan lo por haya entrada gratis na e museonan aki, mientras otronan si ta paga.
