E Mericano Patrick Maxwell cu a maltrata e taxista femenino, Grace Angela (70) severamente y purba di viol’e, a scucha pa di dos biaha un sentencia di 4 aña di prizon.
Aña pasa e caso a bin dilanti Corte di Prome Instancia unda na juli hues a duna sr. Maxwell e mesun sentencia. Pero el a apela entre otro pasobra e ta keda insisti cu e no ta corda nada mas di e incidente y tabata bou influencia. Tambe el a uza su pasado militar cu a lag’e cu un trauma.
Ministerio Publico a exigi 5 aña di prizon den e caso di apelacion.
Sinembargo Corte Superior a sigui e veredicto di Corte di Prome Instancia y a duna sr. Maxwel un sentencia di 4 aña di prizon pa intento di violacion y maltrato severo. El a haya un castigo di 6 luna condicional tambe pasobra e no tabatin un strafkaart prome y el a mustra bon comportacion durante e tratamento di su caso. Tambe el a ofrece e victima un suma di perhuicio.
E incidente a tuma luga riba 28 di januari aña pasa momento cu e tabata riba un ‘retreat’ di su compania. Hunto cu otro coleganan el a sigui trip y dado momento a uza droga tambe. Den e taxi e turista Mericano a bira agresivo y dal e victima, despues di atak’e sexualmente. E taxista a huy pero e turista e keda persigui y purba di choke. Dado momento sr. Maxwell a huy den e taxi pero e victima a purba di stop esaki y asina cay bou di e vehiculo. Sra. Angela a keda severo herida, cu entre otro 5 ribchi y nanishi kibra.
