Turista Mericano haciendo esfuerso pa tene Aruba limpi

AHATA a habri aña conscientisando un y tur riba eliminacion di saconan di plastic den nos bida diario. Tur esaki a bini despues cu aña pasa parlamento a aproba e ley di saco di plastic. Un ley cu a keda implementa desde 1 di januari 2017. Pero no ta AHATA so!

E asociacion di industria turistico tin un di e miho soldaatnan pa yuda hiba e mensahe importante aki na e localnan como tambe na tur otro bishitante di nos isla. Larry Darick di Pennsylvania, Merca tin 22 aña bishitando Aruba y desde e prome biaha e a haci’e su mision pa haci e beachnan limpi. AHATA ta desea gradici señor Larry Darick, pa tur esfuerzo cu e ta haci durante su vacantie riba nos isla pa nos costanan mustra bunita y pa conscientiza hende riba importancia di mantene Aruba limpi. Ahata: “Danki señor Darick di curazon!”

“Pa e 22 añanan cu mi ta bin Aruba mi ta lanta mainta tempran. Mi ta bay na e beach entre 2 pa 4 ora, dependiendo con mi ta sinti ya cu mi tin 72 aña di edad y a haci 3 operacion di curason pero ta den bon salud. Durante mi keiro riba beach mi ta haci’e limpi pasobra mi ta kere cu Dios ta bisando mi pa haci’e. Mi a sobrevivi un accidente hopi pisa y mi a bisa mi mes cu mi kier haci algo positivo pa resto di mi bida y esaki ta loke mi ta haci. Te hasta bek na Merca, na mi cas mi ta haci limpi, haci limpi y haci mas limpi,” asina Larry a splica.

Pa e bishitante aki e ta un lastima di mira un Aruba sushi pasobra e ta un isla asina bunita… “pa chikito cu e ta e ta simplemente un isla bunita. Haci’e mas bunita!” Larry ta bishita Aruba un biaha pa aña, tur aña pa entre 4 pa 5 siman den mesun temporada. “Mi casa tabata yuda mi antes pero su edad tambe a subi. E ta bin cu mi mas o menos 2 biaha pa siman. E ta piki e pida glasnan di lama. E ta bay cu e cosnan bon y laga esunnan malo pa mi y ta parti nan cu e turistanan.”

Larry Darick ta gusta conta anecdota di su estadianan na Aruba y un di esunnan cu tur ta corda ainda te awe y cu a bira un leyenda a pasa na 1997. “E tabata mi di tres aña biniendo Aruba. Mi tabata kedando na Tamarijn y despues mi a muda pa Divi Village. Ora cu nos a yega e biento no tabata supla. Tur hende tabata keha calor y cu no tabata tin biento. Asina ta mi a bisa cu mi ta bay mira kico ta pasando. Mi a bay e otro banda di e isla banda di e Lighthouse y e golf course. Eynan tabata tin un muraya di mas o menos 4 pa 5 pia halto traha di staal y e tabata cubri cu saconan di plastic. Mi tabata mira e biento supla bayendo ariba cu tur e saconan di plastic pero nada na e otro banda di e isla. Asina ta mi a haci’e completamente limpi y e hendenan a bisa mi despues cu mi a haci cu biento a supla atrobe na Aruba. Esey tabata un leyenda bieu!,” Larry ta bisa cu un sonrisa riba su cara.

E boluntario di haci beachnan limpi ta bisa cu mayoria di e sushi riba e beach aki ta di Trinidad & Tobago, Islanan Santa Maria, Venezuela… “y ocasionalmente mi ta haya piesanan straño. E aña aki mi a haya dos bleki di Coca-Cola cu ta bisa ‘traha na Sur-Africa’. Mi no sa con nan a yega aki y ultimamente mi ta haya hemchinan chikito di plastic cu cosnan pega den nan, manera un helm duro y mi sa cu e por ta di un barco di Peking para p’afo. E artefactonan aki ta cay for di e barco y esey pa mi ta hopi dañino pa e medio ambiente. Animalnan ta come nan y e ta haci nan daño”.

E ta sigui bisa cu tempo cu el a bin Aruba pa prome biaha e isla tabata basta sushi. “Mi a bay rond di e isla y tabata tin sushedad tur caminda mas ainda despues di carnaval. E ta tuma entre un pa dos siman pa haci limpi riba beach y tur aña cu mi bin bek centro di ciudad ta limpi, e barionan ta limpi. Mi sa di algun luganan riba e isla unda tin areanan di dump cu hopi no conoce. De bes en cuando ta mira e dump cu nos ta yama “wild cat dump” unda tur hende ta tira tur cos,” asina Larry a bisa un poco serio.

“Pero e isla a mehora asina hopi y ami kier mira e keda asina y bira mas limpi. E unico cu ami ta saca for di esaki ta cu mi ta spera si stop uzo di saconan di plastic awor mes entre 5 pa 10 aña e lo haci un diferencia grandi. Esaki ta loke mi kier mira. Un fin na esaki pasobra e ta pio cu ‘global warming.’ E ta mata animalnan”.

E amante di un isla limpi ta bisa cu porta e muchanan cu ta haya un educacion hopi bon na Aruba lo por carga esaki. Arubianonan ta hendenan fantastico. Aruba ta pa e muchanan y nan yiunan y pa e futuro. “Mi lo no ta akinan pa mir’e completamente limpi… pero mientras cu Dios duna mi forsa pa sigui bin Aruba, lo mi haci mi miho esfuerso!”