E turista Mericano cu a keda deteni 4 luna pa motibo cu a descubri un arma den su tas durante control na aeropuerto di Aruba, a keda poni den libertad.
Bon Dia a puntra Ministerio Publico dicon a laga e señora bay y a contesta cu corte a dicidi esaki riba 8 di juli. Motibo principal tabata cu e oficial di aerpuerto a touch e arma cu su man y asina a kita e oportunidad di Anderson pa prueba cu su fingerprint no ta riba e arma sea tin fingerprint di otro persona riba dje. E camaranan na aeropuerto tampoco a yuda registra kico a pasa pasobra nan ta move pa graba full e espacio unda ta controla e pasaheronan. Pues e imagennan tampoco ta exclui e posibilidad cu un otro persona por a pone e arma den e tas di e turista Mericano. Finalmente e motibo di Anderson pa comete un acto ilegal asina no a sali mucho cla tampoco, segun e hues.
E caso di e turista Anne Anderson a hala basta atencion pa motibo cu e comunidad di Pine Bluff, unda Anderson ta biba, a cuminsa un accion. E señora tabata hopi envolvi den misa y segun e pastor y tambe su famia, Anderson cu ta un docente pensiona, nunca den su bida a actua contra ley of tabata envolvi den actividad criminal. Pues nan tabata den shock completo ora nan a tende cu el a wordo detene pa posesion di arma. Anderson semper a para riba su inocencia y a declara cu un otro persona a sconde un arma den su tas ora e kier regresa Merca despues di un vakantie na Aruba.
