A traves di un pagina di Facebook “Aruba Foodies” un turista a expresa su preocupacion y malcontento pa loke ta trata un situacion caminda algun restaurant of na e isla ta bisa riba nan menu cu nan ta sirbi e pisca ‘grouper’, pero en realidad nan ta sirbi tilapia of panagasius.
“Esaki ta berdaderamente perturbador. Mi no tabatin idea cu henter e isla di Aruba tabata gaña y bisa cu nan ta sirbi grouper, siendo cu en realidad nan ta sirbi tilapia of panagasius. E grupo aki tin 52 mil miembro cu tin un pagina dedica solamente na cuminda y den mi opinion algo mester wordo haci,” e turista a indica den su publicacion.
El a sigui bisa: “Mi stima Aruba y mi stima e restaurantnan pero di berdad mi ta sinti cu e Gobierno di Aruba mester wordo poni na altura y nan mester duna un splicacion. E isla ta depende di turismo of full e economia ta colapsa.”
E usuario ta remarca cu turistanan mester “realisa e poder cu e grupo tin” y haci algo pa e restaurantnan stop di gaña e turistanan tocante kico nan ta sirbi.
Por ultimo el a indica cu e ta bay haci di su parti pa tuma contacto cu algun persona di gobierno. “Algun persona cu tin algun contacto eynan por fabor lagami sa, of tuma contacto cu nan bo mes. Algo asina por manda e isla bancarota, y ban ta honesto niun di nos kier pa esey pasa,” el a finalisa.
Bon dia Aruba a tuma contacto cu Tisa Lasorte, presidente di AHATA, pa puntra si e organisacion ta na altura di e situacion aki.
“AHATA su posicion ta cu den un restaurant e menu mester refleha realidad. Honestidad y calidad ta sembra confiansa di parti di cliente,” Lasorte a indica den su contesta.
