Diadomingo den oranan di mainta, na momento cu un famia turista kier a bandona Aruba, nan a wordo sorpresa pa recherche na nan hotel na Palm Beach. E team di recherche di Strandpolitie a detene e dos ruman homber.
Esaki ta relaciona cu un investigacion andando riba fraude di credit card. E sospechosonan aki a haci varios compra na Aruba cu credit card cu a wordo raporta di ta horta.
E famia Mericano aki a yega Aruba dia 1 di januari pa pasa un siman di vacacion na Aruba y a keda na un hotel na Palm Beach. Na momento cu nan a cuminsa uza un of mas credit card horta, esaki a keda raporta na autoridad local. Mesora e team di recherche na Strandpolitie a cuminsa cu un investigacion cu a termina diadomingo mainta na e hotel unda e dos sospechoso y demas famia tabata keda. Un rato prome cu nan mester a check out pa regresa Merca, recherche a drenta den e hotel y a detene e dos ruman homber como e sospechosonan principal.
No ta conoci si e otro tres miembro di famia lo a keda Aruba y si nan lo por a bandona Aruba e mesun dia. E caso ainda ta bou investigacion.
